Apple-ի համահիմնադիր Սթիվեն Վոզնյակը
photo © http://www2.2space.net
Սթիվ Ջոբսն ու Սթիվեն Վոզնյակը
photo © http://magnaefamae.files.wordpress.com

Apple-ի համահիմնադիր Սթիվ Վոզնյակը այսօր Երեւան կժամանի

Երեւան: Մեդիամաքս: Apple-ի համահիմնադիր Սթիվեն Վոզնյակը (Stephen Wozniak) այսօր երեկոյան կժամանի Երեւան` ՀՀ նախագահի «Տեղեկատվական տեխնոլոգիաների ոլորտում համաշխարհային հեղինակություն» մրցանակը ստանալու համար:

Սթիվեն Վոզնյակի ժամանման մասին լուրն այսօր հաստատել են ՎիվաՍել-ՄՏՍ ընկերությունում, որը մրցանակի գլխավոր հովանավորն է:

«Տեղեկատվական տեխնոլոգիաների ոլորտում համաշխարհային հեղինակություն» առաջին մրցանակը 2010 թվականին ստացել էր Intel-ի տնօրենների խորհրդի նախկին նախագահ Քրեյգ Բառեթը: Մրցանակի ստեղծման նախաձեռնողը “Սինոփսիս Արմենիա” ընկերությունն է:

1976 թվականի ապրիլի 1-ին Սթիվ Ջոբսն ու Սթիվեն Վոզնյակը ստեղծեցին Apple Computer-ը: Այդ ժամանակ Սթիվեն Վոզնյակը դուրս եկավ Hewlett-Packard-ից եւ դարձավ Apple ընկերության գիտական հետազոտությունների եւ մշակման հարցերով փոխնախագահ:

Մեդիամաքսին “Սինոփսիս Արմենիա”-ից հայտնել են, որ Երեւանում Սթիվ Վոզնյակը կհանդիպի ՀՀ նախագահ Սերժ Սարգսյանին, վարչապետ Տիգրան Սարգսյանին:

Նախատեսվում է, որ Սթիվ Վոզնյակը Հայաստանում 3 օր կանցկացնի: