Երեւան /Մեդիամաքս/. «ՎիվաՍել-ՄՏՍ»-ը հայտարարեց «Բջջային հեռուստատեսության» «Տեսադարան» (Video on Demand) բաժնի գործարկման մասին:
Ինչպես հաղորդում է ՄԵԴԻԱՄԱՔՍ գործակալությունը, այսուհետ բացի հեռուստածրագրով նախատեսված ժամերին հեռարձակվող հաղորդումներից, ընկերության բաժանորդները կարող են ձեռք բերել նաեւ տարբեր տեսակոնտենտ:
«Տեսադարան» բաժինը հասանելի է բոլոր այն բաժանորդներին, որոնց հեռախոսները համատեղելի են 3G-ի ցանցի հետ:
«Տեսադարանից» օգտվելու համար ընդամենն անհրաժեշտ է օգտագործման համար դյուրին մենյուից ընտրել նախապես տեսագրված նյութը, որը հասանելի կլինի ձեռք բերման պահից սկսած` 24 ժամվա ընթացքում:
«Տեսադարան» բաժնում բաժանորդները կարող են կինոնկարների, ժամանցային և երգիծական հաղորդումների, մուլտֆիլմերի եւ տեսահոլովակների ցանկից ընտրել նախընտրած տեսանյութը եւ վճարել միայն ընտրված կոնտենտի համար: Ստեղծված է ընտրվելիք նյութի համառոտ տարբերակը դիտելու, ապա նոր միայն այն ձեռք բերելու հնարավորություն:
Տեսակոնտենտի սակագինը կախված է դրա բովանդակության տեսակից: Գործում է սակագին` 160, 250 եւ 300 դրամ:
«Հայաստանյան բաժանորդների շրջանում տեխնոլոգիական վերջին նվաճումների կիրառման և նրանց կարիքներին առավել համապատասխան ծառայությունների մատուցման պահանջարկ կա: Մենք ուրախ ենք այդ ցանկությանն ընդառաջ գնալու ՎիվաՍել-ՄՏՍ-ի ապրանքանշանի հերթական քայլի եւ հաճախորդների պահանջներին համապատասխան` հեռահաղորդակցության ոլորտում առաջադեմ և նորարարական ծառայություններ ներկայացնելու համար», - ասաց ընկերության գլխավոր տնօրեն Ռալֆ Յիրիկյանը:
