Վերազինվել է «Հայաստանի կույրերի միավորում» ՀԿ-ի համակարգչային լաբորատորիան

Հայաստանի օպերատորների միությունը եւ Հեռահաղորդակցության միջազգային միությունը հանդես են եկել համատեղ բարեգործական նախաձեռնությամբ։    

Հայաստանի օպերատորների միության եւ Հեռահաղորդակցության միջազգային միության կողմից «Հայաստանի կույրերի միավորում» ՀԿ-ի համակարգչային լաբորատորիային է տրամադրվել ժամանակակից համակարգչային տեխնիկա եւ աքսեսուարներ։     

«Անչափ կարեւորում ենք հատուկ կարիքներ ունեցող անձանց առավելագույն ինտեգրումը հասարակությանը եւ ժամանակակից տեխնոլոգիաներին տիրապետելը։ Կույրերի միավորումը այն կենտրոններից է, որը նպաստում է շահառու անձանց` հասարակությանը լիարժեք ինտեգրվելու խնդիրների լուծմանը՝ հնարավորություններ ստեղծելով նրանց մասնագիտական զարգացման համար եւ տալով աշխատանքային հնարավորություններ»,- նշել է Հայաստանի Օպերատորների միության տնօրեն Քրիստինե Գյոնջյանը։    

Հեռահաղորդակցության միջազգային միությունը տարիներ շարունակ ուշադրության կենտրոնում է պահում սահմանափակ հնարավորություններ ունեցող անհատների թվային գրագիտության բարձրացման եւ ՏՀՏ գիտելիքներով ապահովման խնդիրը։

Կենտրոնին «Ինտերնետ հանրություն» ՀԿ-ի կողմից տրամադրվել են նաեւ օդորակիչներ համակարգչային չջեռուցվող լսարանները տաքացնելու համար: