Վիքի.հայ-2023. հայերեն առցանց հանրագիտարանը հարստացել է 769 հոդվածով

Հայերեն «Վիքիպեդիա» առցանց հանրագիտարանի 32 խմբագիր մեկ ամսում ստեղծել է հայերեն 769 նոր հոդված։  

«Վիքի.հայ» ամենամյա մրցույթը, որի շրջանակում իրականացվել է այս աշխատանքը, կազմակերպել են «Ինտերնետ հանրություն» (ISOC.AM) եւ «Վիքիմեդիա» կազմակերպությունները։ Նպատակը համացանցում հայերեն բովանդակության հարստացումն է, հայության մասին հոդվածների պատրաստման խթանումը։  

Մրցույթի արդյունքներն ամփոփվել են նոյեմբերի 29-ին, մրցանակաբաշխության հանդիսավոր արարողությամբ։ Աշխատանքը գնահատվել է հոդվածների քանակի եւ որակի համադրմամբ։

Լավագույնն են ճանաչվել վիքի 5 խմբագիր՝ արժանանալով «Ինտերնետ հանրություն» ՀԿ սահմանած դրամական պարգեւների եւ մասնակցության հավաստագրերի, 2 խմբագրի էլ շնորհվել է խրախուսական հավաստագիր։

«Արդեն երեք տարի հետեւողականորեն սկսել ենք այս աշխատանքը «Վիքիմեդիայի» հետ եւ ուրախ ենք արձանագրել, որ միայն այս մրցույթի շնորհիվ ունենք ստեղծված շուրջ 2000 հոդված»,- ասել է «Ինտերնետ հանրություն» ՀԿ խորհրդի անդամ Քրիստինա Հակոբյանը։