Համակարգը կօգնի ՀՀ բանկերին ձայնի եւ դեմքի միջոցով ճանաչել մարդուն

Ռուսաստանյան Центр Речевых Технологий (ЦРТ, «Խոսքային տեխնոլոգիաների կենտրոն») ընկերությունների խումբը «Նիկիտա Մոբայլ» ընկերությունում կազմակերպված նկարագիր շնորհանդեսի ընթացքում Հայաստանի մի շարք բանկերի ներկայացրել է ձայնի եւ դեմքի միջոցով մարդուն ճանաչելու համակարգը:

«Նիկիտա Մոբայլ»-ում նշել են, որ ձայնի միջոցով մարդու ճանաչման ծառայությունը թույլ է տալիս պահպանել հաճախորդների սպասարկման բարձր որակը, ինչպես նաեւ խուսափել խաբեություններից. ոչ ոք չի կարող մեկ այլ անձի անունից ներկայանալ եւ անձի բանկային տվյալների մասին տեղեկատվություն ձեռք բերել: Իսկ դեմքի ճանաչման համակարգը թույլ է տալիս ճանաչել նույնիսկ քողարկված արտաքինով անձանց:

Նկարագիր շնորհանդեսն անցկացվել է «Նիկիտա Մոբայլ» եւ «Ինկրիպտ» ընկերությունների աջակցությամբ:

ЦРТ-ն տեղեկատվական եւ ինովացիոն համակարգեր մշակող ընկերություն է դեմքի եւ ձայնի կենսաչափության ոլորտում: Ֆինանսական կազմակերպությունները, տեղեկատվական կենտրոնները, հեռուստահաղորդակցական ընկերությունները, արտադրական ձեռնարկություններն օգտագործում են ЦРТ-ի ծառայությունները բիզնես գործընթացների օպտիմալացման, հաճախորդների սպասարկման ավտոմատացման, անվտանգության մակարդակի բարձրացման եւ վերլուծական տեղեկատվության ապահովման համար:

Նկարագիր շնորհանդեսին աջակցող «Ինկրիպտ» ընկերությունը համակարգային ինտեգրատոր է, որն իր ներդրումն է կատարում Հայաստանի տեղեկատվական եւ հաղորդակցման տեխնոլոգիաների զարգացման համար:

««Ինկրիպտ»-ի աշխատակազմը շատ հպարտ է նրանով, որ այսօր իր ներդրումն է կատարում երկրի արդիականացման, ժամանակակից տեխնոլոգիաների եւ լուծումների առաջարկման մեջ»,- ասված է հաղորդագրությունում:

Նկարագիր շնորհանդեսի անցկացմանը աջակցող մյուս ընկերությունը՝ «Նիկիտա Մոբայլը», մատուցում է բջջային մարքեթինգի, զանգերի կենտրոնի եւ էլեկտրոնային կոմերցիայի ծառայություններ: