Հայ-ամերիկյան SoloLearn ստարտափը հայտարարել է $5,6 մլն արժողությամբ վենչուրային ներդրում ստանալու մասին:
Ծրագրավորում սովորեցնող հավելվածը նաեւ հաղթահարել է ամսական 1 մլն ակտիվ օգտատիրոջ սահմանագիծը:
Ներդրումը գլխավորում է Naspers Ventures-ը: Ռաունդին մասնակցել է նաեւ Learn Capital-ը, որը ստարտափի սաղմնային փուլի ներդրողներից է:
![](/datas/znews/small_[{"basename":"TOP.jpg","link":"\/2017\/07\/11\/59648d1e026e30.35402814.jpg","description":{"am":{"label":"","author":""},"ru":{"label":"","author":""},"en":{"label":"","author":""}},"show_in_text_place":"","hide_from_gallery":"on","sort_order":"0","top":"off"}])
SoloLearn-ում նշել են, որ նոր ներդրումային ռաունդը թույլ կտա ընկերությանն արագացնել գլոբալ աճը եւ լոկալիզացիայի գործընթացը, ընդլայնել թիմը` Հայաստանում եւ ԱՄՆ-ում, ինչպես նաեւ նոր ծառայություն գործարկել, որը կօգնի համայնքի անդամներին կարիերայի ընտրության հարցում:
«SoloLearn-ն օգտագործվում է ուսանողների կողմից ամբողջ աշխարհում, որոնք ցանկանում են բարելավել իրենց ծրագրավորման հմտությունները: Մենք էլ ցանկանում ենք ընդլայնվել եւ ավելի շատ ուսանողների տրամադրել բազմազան եւ առաջադեմ ուսումնական կոնտենտ»,- նշել է Sololearn-ի գործադիր տնօրեն Եվա Հյուսյանը:
2014թ. հիմնադրված ստարտափի համանուն հավելվածի օգտատերերի կեսից ավելի ներկայացնում են ԱՄՆ-ն, Հնդկաստանը եւ Ռուսաստանը: Հավելվածով կարելի է սովորել JavaScript, Swift, Python, C++, HTML/CSS եւ այլ ծրագրավորման լեզուներ: Առկա է նաեւ մասնագիտացած կոնտենտ՝ մեքենայական ուսուցման, արհեստական բանականության, ալգորիթմների մասին:
Վեբ տարբերակից բացի՝ SoloLearn-ը հասանելի է Google Play-ում եւ App Store-ում:
Ստարտափը 2016թ. հոկտեմբերին հայտարարել էր $1,2մլն սաղմնային ներդրում ստանալու մասին: Ներդրումն իրականացրել էին Learn Capital վենչուրային հիմնադրամը, ինչպես նաեւ SoloLearn-ում նախկինում ներդրումներ կատարած անհատներ:
