Աշխարհի յոթ ամենախոստումնալից StartUp-ները մրցել են Երեւանում

Երեւանում անցկացված համաշխարհային StartUp-ների առաջնության ընթացքում աշխարհի յոթ ամենախոստումնալից  StartUp-ները մրցել են հաղթողի կոչման համար:

Թիմերը ներկայացրել են Պակիստանը, Լիբանանը, Եգիպտոսը, Մալազիան, Ֆիլիպինները, Ռուսաստանը եւ Գանան:

«Համաշխարհային StartUp Cup-ը նպատակ ունի ներկայացնել տարբեր տնտեսական միջավայրերում գործող ամենահաջողակ ձեռնարկատերերին ու նորաստեղծ բիզնեսները: Հայաստանյան StartUp առաջնությունը Միացյալ Նահանգներից դուրս անցկացված առաջին մրցույթներից էր, ուստի ամենեւին էլ պատահական չէ, որ առաջին ամենամյա Համաշխարհային StartUp Cup-ն անցկացվում է հենց Հայաստանում»,- ասել է StartUp Cup-ի հիմնադիր եւ գործադիր տնօրեն Շոն Գրիֆինը:

«Հայաստանը չափազանց մեծ տեխնոլոգիական ներուժ ունի, բայց դեռեւս այնքան էլ  լավ չի ստացվում այդ ինովացիոն գաղափարները բիզնեսի վերածելը: Մեր նպատակն է օգնել խելացի ու նորարար գաղափարներ ունեցող մարդկանց իրենց գաղափարներին բիզնես արժեք հաղորդել»,- Մեդիամաքս-ի հետ զրույցում ասել է Հայաստանում ԱՄՆ դեսպան Ջոն Հեֆերնը:

Համաշխարհային StartUp Cup-ի հաղթող է ճանաչվել Պակիստանը ներկայացնող Go-Fig թիմը, որի  ներկայացրած ծրագիրը միտված է ահաբեկչությունների կանխարգելմանը: Ծրագիրը թույլ է տալիս կանխատեսումների միջոցով հայտնաբերել, թե որտեղ է տեղի ունենալու հաջորդ ահաբեկչական հարձակումը եւ նվազեցնել վնասները ծրագրային հարթակի միջոցով:

Երկրորդ եւ երրորդ տեղերը զբաղեցրել են համապատասխանաբար Գանան ներկայացնող Bravehearts Expeditions եւ Ռուսաստանը ներկայացնող Oriense  թիմերը:

Bravehearts Expeditions-ի առաքելությունն է ոգեշնչել երիտասարդներին, որպեսզի նրանք կյանքում հասնեն դրական փոփոխությունների՝ արկածային արշավների, թիմային համայնքային նախագծերի, ինչպես նաեւ կայուն բնապահպանական ծրագրերի իրականացման միջոցով:

«Մենք առաջարկում ենք լուծումներ, որոնց նպատակն է վատ տեսողություն ունեցող կամ կույր մարդկանց օգնել կողմնորոշվել ու տեղաշարժվել առօրյայում»,- Մեդիամաքս-ի հետ զրույցում նշել է Ռուսաստանը ներկայացնող Oriense թիմի անդամ Վիտալի Կիտաեւը: