Եվս չորս երկրում կբացվեն Հայաստանի ՏՏ ներկայացուցչություններ

Armenian Science & Technology Center (ASTC) ծրագրի շրջանակում մինչեւ աշուն Հայաստանի ՏՀՏ ոլորտի ներկայացուցչական գրասենյակներ կբացվեն Մեքսիկայում, Ռուսաստանում, Իրանում եւ Իսպանիայում:

Այս մասին այսօր լրագրողների հետ հանդիպմանն ասել է ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը՝ հիշեցնելով, որ ՏՀՏ ներկայացուցչություններ արդեն գործում են ԱՄՆ-ում, Բելգիայում, Բոլիվիայում, Ֆրանսիայում եւ Իտալիայում:

Նախաձեռնությունն իրականացվում է ՀՀ կառավարության կողմից՝ ՀՀ տրանսպորտի, կապի եւ տեղեկատվական տեխնոլոգիաների նախարարության եւ «Թեքնոլոջի ընդ Սայնս Դայնամիքս» (TSD) ընկերության միջեւ փետրվարի 24-ին ստորագրված փոխըմբռնման հուշագրի շրջանակում:

TSD ընկերության հիմնադիր տնօրեն Վահան Շաքարյանն էլ նշել է, որ Հայաստանում մասնագետներ գտնելու խնդիր ունեն՝ համապատասխան լեզվի, տնտեսագիտության, մարքեթինգի իմացությամբ, որոնք պատրաստ կլինեն աշխատել արտերկրում գտնվող ՏՀՏ ոլորտի ներկայացուցչական գրասենյակներում:

«Մենք այսօր ունենք որոշակի խումբ՝ մոտ 60 հոգի, որոնց հետ արդեն 4-րդ ամիսն է շաբաթական 2-3 անգամ աշխատում ենք: Եվ դեռեւս չունենք այն 17-20 թեկնածուները, որոնք պատրաստ կլինեն դրսում աշխատել: Այդ իսկ պատճառով արդեն գործող 5 ներկայացուցչություններում աշխատելու համար վարձել ենք տեղացիների»,- նշել է Վահան Շաքարյանը:

Նա նաեւ տեղեկացրել է, որ մոտ օրերս հուշագիր կստորագրվի իտալական IDS Corporation-ի հետ՝ Հայաստանում գիտահետազոտական լաբորատորիա հիմնելու նպատակով:  

«Այս օրերին Հայաստանում են IDS Corporation-ի ներկայացուցիչները, որոնք նպատակ ունեն Հայաստանում ստեղծել գիտահետազոտական լաբորատորիա: Մոտ օրերս կվերջացնենք պայմանագրի իրավաբանական մասը, որին կհաջորդի պայմանագրի ստորագրումը»,- տեղեկացրել է Վահան Շաքարյանը: