ԱՊՊԱ պայմանագիրը կարելի է վերակնքել հավելվածի միջոցով

Գործարկվել է APPA մոբայլ հավելվածը, որը հնարավորություն է տալիս պարզ եւ արագ կերպով վերակնքել ԱՊՊԱ պայմանագիրը:

Հավելվածը հասանելի է AppStore-ում եւ Google Play-ում:

Հավելվածը ստեղծել են Ռոբերտ Կադարյանը, Նարեկ Գեւորգյանը եւ Տարոն Ավետիսյանը:

Itel.am-ի հետ զրույցում Ռոբերտ Կադարյանը տեղեկացրել է, որ այս պահին հավելվածը ներբեռնվել է շուրջ 200 անգամ:

«Անհրաժեշտ է լուսանկարել գործող ԱՊՊԱ պայմանագիրը կամ պայմանագրի կնքման համար պահանջվող փաստաթղթերը, ընտրել ապահովագրական ընկերությունը եւ նոր պայմանագրի ժամկետը: Մենք համագործակցում ենք ապահովագրական բոլոր ընկերությունների հետ՝ գործակալական հիմունքներով: ԱՊՊԱ սակագինը բոլոր դեպքերում նույնն է մնում, իսկ հաճախորդը շահում է ժամանակի մեջ»,- ասել է Ռոբերտ Կադարյանը:

Ներկայացնելով պայմանագրի վերակնքման ամբողջական գործընթացը՝ նա տեղեկացրել է, որ իրենց կողմից հաստատված պայմանագիրն առաքվում է աշխատակցի կողմից, որի ժամանակ էլ հաճախորդը ստորագրում է այն եւ վճարում ապահովագրության արժեքը:

Ռոբերտ Կադարյանի խոսքով՝ հետագայում նախատեսում են գործարկել նաեւ էլեկտրոնային վճարման համակարգ:

Նախագիծն ամբողջությամբ ֆինանսավորվել է հիմնադիրների միջոցներով: Դիզայներական աշխատանքներն իրականացրել է Door Studios-ը:

«2015թ. դեկտեմբերին հավելվածը պատրաստ էր եւ արդեն հասանելի App Store-ում եւ Play Market-ում: Սակայն ծրագրային մի շարք խնդիրներ առաջացան, որոնք այս պահին լուծվել են: Հուսով ենք` հավելվածը դուր կգա մարդկանց»,- նշել է Ռոբերտ Կադարյանը:

Նա տեղեկացրել է, որ առաջիկայում ավելացվելու են նոր գործառույթներ, այդ թվում` այլ տեսակի ապահովագրական ծառայություններից (տուրիստական, առողջության, դժբախտ պատահարներից ապահովագրություն եւ այլն) օգտվելու հնարավորություն:

Նարինե Դանեղյան