11:42 | 27.01.16 | Նորություններ | exclusive 3175

Dictoro-ն արդեն հասանելի է հայերենով

Հայկական Dictoro սպորտային հարթակը, որտեղ կարելի է կանխատեսել ֆուտբոլի եվրոպական առաջնությունների հանդիպումների հաշիվները, արդեն հասանելի է հայերեն լեզվով:

Այս մասին Itel.am-ին պատմել է հարթակի հիմնադիր Հայկ Արամյանը:

«Մեկ շաբաթ առաջ գործարկեցինք բազմալեզու ինտերֆեյսը: Ավելացվեց հայերենը` հաշվի առնելով այն, որ մեր լսարանի գերակշիռ մասն այս պահին Հայաստանից է: Այժմ հարթակը հասանելի է երեք լեզուներով (հայերեն, ռուսերեն, անգլերեն): Բազմալեզու ինտերֆեյսի հիմնական նպատակներից է միջազգային շուկա մտնելը: Շուտով կավելացվեն նաեւ ֆրանսերենը, գերմաներենը, պորտուգալերենը, որից հետո կփորձենք աշխատել այդ լեզուները գործածող երկրներում»,- նշել է Հայկ Արամյանը:

Dictoro-ն այս պահին ունի օրական 400 ակտիվ այցելու: Հայկ Արամյանը հետաքրքիր է համարում այն, որ այցելուների մի մասն օգտվում է Dictoro-ից ոչ միայն կանխատեսումներ կատարելու, այլեւ խաղերի հաշիվներին օնլայն հետեւելու համար:

Ինչ վերաբերում է հավելվածին, ապա Dictoro-ի Android տարբերակը ներկայում ունի շուրջ 300 ներբեռնում, ինչը, Հայկ Արամյանի կարծիքով, մեծ թիվ է, հաշվի առնելով այն, որ այցելուների մեծ մասը Հայաստանից է: Շուրջ մեկ ամսից էլ կգործարկվի հարթակի iOS տարբերակը:

Նարինե Դանեղյան