«Յուքոմը» հաստատեց, որ ցանկանում է գնել «Օրանժ Արմենիա»-ն

«Յուքոմ» ընկերության մամուլի ծառայությունն այսօր հանդես է եկել հետևյալ հաղորդագրությամբ.

««Օրանժ» եւ «Յուքոմ» ընկերությունները բանակցում են «Օրանժ Արմենիա» ընկերության 100 տոկոս բաժնետոմսերի ձեռքբերման շուրջ: Արդեն իսկ տարվում են բանակցություններ միջազգային ֆինանսական հաստատությունների ներգրավման ուղղությամբ:

Հաշվի առնելով համաշխարհային հեռահաղորդակցության շուկայի զարգացման միտումները՝ «Յուքոմ»  ընկերությունը 2013 թվականին արդեն իսկ ձեռք էր բերել շարժական կապի 4G տեխնոլոգիայով ծառայությունների մատուցման թույլտվություն եւ 2016 թվականից պլանավորում է մատուցել բարձրակարգ ծառայություններ LTE սերնդի կապուղիներով:

«Օրանժ Արմենիա» ընկերությունը հայաստանյան հեռահաղորդակցության շուկայում սկսել է իր գործունեությունը 2009 թվականին եւ անցած 6 տարիների ընթացքում իր պրոֆեսիոնալ աշխատակազմի շնորհիվ հասել է մեծ հաջողությունների՝ դառնալով վստահելի եւ սիրված կապի օպերատոր հարյուր  հազարավոր բաժանորդների համար:

«Յուքոմ» ընկերությունը, առաջարկելով նորարական լուծումներ եւ բարձրորակ ծառայություններ, կարճ ժամանակահատվածում կարողացել է իր հաստատուն տեղը զբաղեցնել ֆիքսված կապի շուկայի առաջատարների շարքում:

«Օրանժ» եւ «Յուքոմ» ընկերությունների բանակցությունների դրական ավարտը հնարավորություն կընձեռի պահպանելու եւ միավորելու «Օրանժ Արմենիա» ընկերության մոտ 500 հոգուց բաղկացած պրոֆեսիոնալ աշխատակազմի ներուժը, ինչպես նաեւ նորարարական տեխնիկական հզորությունը: Արդյունքում՝ բաժանորդներին կմատուցվեն գերժամանակակից եւ որակապես տարբերվող կոնվերգենտ ծառայություններ, ինչպես նաեւ լրացուցիչ հարմարավետություն՝ մեկտեղելու բազմազան ծառայությունները եւ օգտվելու հեռահաղորդակցման ծառայությունների ողջ սպեկտրից մեկ վստահելի օպերատորից, ինչի հնարավորությունը մինչ այժմ չի եղել հայաստանյան շուկայում»։