Plant a tree. Տնկիր քո ծառը` ուրիշի ձեռքով

Հայկական նորաստեղծ Plant a tree ստարտափի միջոցով կարող եք ծառ տնկել, սակայն անձամբ չմասնակցել ծառատունկին եւ այդպիսով ժամանակ խնայել:

Նորաստեղծ հարթակը շրջակա միջավայրի պահպանման նպատակ ունի:

Itel.am-ի հետ զրույցում ստարտափի հեղինակ եւ հիմնադիր Տիգրան Սիմոնյանը պատմում է, որ ստարտափի գաղափարը ծագել է կոնկրետ խնդրի արդյունքում: 

«Խնդիրը ոչ միայն շրջակա միջավայրի պահպանումն է, այլեւ այն, որ մենք՝ ծրագրավորողներս, ժամանակ չունենք, սակայն մեծ ցանկություն ունենք մասնակցել շաբաթօրյակներին: Ինչպես ասում էր Սոկրատեսը, «Ցանկություն ունեցող մարդիկ փնտրում են լուծումներ, իսկ ցանկություն չունեցողները՝ պատճառներ»»,- նշում է նա:

Կայքի քարտեզի վրա կարելի է նշել այն վայրը, որտեղ ցանկանում եք տնկել ձեր ծառը, եւ կատարել վճարում: Մեկ ծառի տնկման արժեքը $10 է:

Տիգրան Սիմոնյանը նշում է, որ թիմում այս պահին երկու մարդ կա, որոնք զբաղվում են պատվերների կատարմամբ: Առաջիկայում պատրաստվում են ծառատեսակներն ավելացնել:

Ստարտափի հիմնադիրը նշում է, որ գաղափարը շատերին է դուր եկել, եւ արդեն բազմաթիվ առաջարկներ են ստացել՝ այն ավելի հարմարավետ դարձնելու համար:

«Քանի որ ծառերը պետք է տնկել աշնանը, այս պահին մեր միակ խնդիրը եղանակային պայմաններն են: Մենք պահպանել ենք մեր պատվիրատուների տվյալները, եւ աշնանը նրանք կստանան էլեկտրոնային նամակ, որով կկարողանան հաստատել իրենց պատվերը»,- ընդգծում է Տիգրան Սիմոնյանը:

Plant a tree ստարտափի զարգացմանը նպաստել է Մայքրոսոֆթ ինովացիոն կենտրոնը՝ իր «Բիզնես խորհրդատվություն եւ ինկուբացիա» ծրագրով:

Նարինե Դանեղյան