12:15 | 06.03.15 | Հոդվածներ | exclusive 7156

Ping-ը կհիշեցնի «անհիշելին»

Օրվա ընթացքում մարդիկ հաճախ կարիք են ունենում բարեկամներին եւ ընկերներին հիշեցնել կարեւոր մանրուքների մասին, ինչպես օրինակ՝ ինտերնետի կամ լույսի վարձը վճարել, բանկ այցելել, մորաքրոջ ծննդյան օրը շնորհավորել եւ այլն:

Հայ ծրագրավորողների մշակած Ping մոբայլ հավելվածը հնարավորություն է տալիս ուղարկել ակնթարթային հիշեցումներ՝ զանգելու կամ կարճ հաղորդագրություն (sms) գրելու փոխարեն:

Ping-ը թույլ է տալիս ավելացնել հիշեցման ժամանակը, վայրը, զուգահեռ լուսանկար ուղարկել, ինչպես նաեւ գրել շարժառիթը, որը կստիպի դիմացինին իրականացնել առաջադրանքը: Դուք կարող եք հիշեցումը ուղարկելիս նշել գործողության կատարման ցանկալի վայրը, եւ երբ ստացողը մոտենա դրան, հիշեցում (alarm) կստանա:
   
Հավելվածը հասանելի է iOS համակարգով աշխատող սարքերի համար:

Ping-ի հիմնադիրներն են Տիգրան Գրիգորյանցը, Արմեն Մկրտչյանը եւ Անատոլի Պետրոսյանցը:

«Մարդիկ կարծում են, որ ամեն ինչ կարող են հիշել, սակայն իրականում մոռանում են: Հնարավոր է՝ նրանց համար դժվար է թղթի վրա կամ սմարթֆոնում հիշեցում գրել, կամ էլ միտքը այլ կարեւոր հարցերով է զբաղված: Ասենք դուք ձեր մտերիմներից մեկին sms եք ուղարկում, նա այն կարդում է եւ գուցե մոռանում: Մեր նպատակն է օգնել մարդկանց չմոռանալ«կարեւոր մանրուքների» մասին, որոնք կարող են փչացնել հարաբերությունները եւ լարել նյարդերը»,- Itel.am-ի հետ զրույցում նշել է Տիգրան Գրիգորյանցը:


Տիգրան Գրիգորյանցը

Ping-ի հեղինակն այն անվանում է «անձնական օգնական» հարազատների, ընկերների եւ գործընկերների համար: Հեռախոսը միացնելուն պես Ping-ը հայտնվում է՝ հիշեցնելով ձեր կարեւոր անելիքների մասին:

Ping-ը տարբերվում է իր մինիմալիստական դիզայնով: Օգտատերի հեռախոսահամարը նրա ID-ն է, եւ նրան անհրաժեշտ մարդիկ կոնտակտներից ավտոմատ կավելացվեն Ping-ում: Օգտատերը միայն պետք է ընտրի այն մարդուն, որին ցանկանում է հիշեցում ուղարկել:

«Երբ օգտատերը ստանում է Ping, հայտնվում է 2 կոճակ՝ առաջադրանքը կատարելու հաստատում կամ մերժում: Այն բանից հետո, երբ դուք սեղմում եք այդ կոճակներից մեկը, ուղարկողը ծանուցում է ստանում, որ դուք կա՛մ հաստատել, կա՛մ էլ մերժել եք առաջադրանքը: Եթե առաջադրանքն այլեւս ակտուալ չէ, ուղարկողը կարող է չեղարկել Ping-ը: Այն դեպքում, երբ ստացողը երկար ժամանակ չի պատասխանում ձեր Ping-ին, կարող եք այն եւս մեկ անգամ ուղարկել՝ RePing անել»,- պատմել է Տիգրան Գրիգորյանցը:

Նա տեղեկացրել է, որ փետրվարի սկզբից պրոմոարշավ են սկսել ԱՄՆ-ում, որն իրականացնում է միջազգային մարքեթինգով զբաղվող ամերիկյան ընկերություն:

«Մեր հիմնական թիրախն այս պահին ամերիկյան շուկան է, սակայն որոշ ժամանակ անց թիրախում կհայտնվի նաեւ Ռուսաստանը: Ի դեպ, այս պահին նկարահանում ենք զվարճալի կոմերցիոն տեսահոլովակ այն մասին, թե ինչ կլինի այն դեպքում, եթե մարդիկ օգտագործեն կամ չօգտագործեն Ping-ը: Այն հասանելի կլինի մարտի վերջին»,- ասել է Տիգրան Գրիգորյանցը:

Ներկայում մշակման փուլում է նաեւ Apple Watch-ի համար մշակված հավելվածի տարբերակը: Այնուհետ թիմը կսկսի աշխատել հավելվածի Android տարբերակի վրա, որը կթողարկվի մինչեւ այս ամառ:

«Իմ տեղեկություններով՝ մենք առաջին հայկական մոբայլ հավելվածն ենք, որը մոտ ապագայում կաշխատի Apple Watch եւ Android Wear սարքերի համար: Բոլոր մշակումները կատարվում են թիմի ներսում, քանի որ ինքս դեմ եմ outsource եւ freelance գաղափարներին»,- նշել է Ping-ի համահիմնադիրը:

Ping-ի 6-հոգանոց թիմում բոլորը հայեր են: Երկուսն աշխատում են ԱՄՆ-ում: Տիգրան Գրիգորյանցը նշել է, որ թիմն իր համար ամենաթանկ ակտիվն է:

Անդրադառնալով Ping-ի մոնետիզացիայի հետ կապված ծրագրերին՝ նա նշել է. «Ներկայում 3 տարվա զարգացման հստակ պլան ունենք: Մոնետիզացիան, մեր հաշվարկներով, կսկսենք 2016թ. գարնանը կամ մի փոքր ավելի շուտ»:

Նարինե Դանեղյան