ՎիվաՍել-ՄՏՍ-ը եւ ԻՏՁՄ-ն 5 դպրոցների հանձնել են ռոբոտներ

Երեւան/Մեդիամաքս/. ՎիվաՍել-ՄՏՍ ընկերությունը եւ Ինֆորմացիոն տեխնոլոգիաների ձեռնարկությունների միությունը (ԻՏՁՄ) ռոբոտներ են նվիրել 5 կրթական հաստատություններին:

Կոնստրուկտոր-ռոբոտներ են ստացել Քվանտ եւ Պոլիտեխնիկի հենակետային վարժարանները, Մխիթար Սեբաստացի կրթահամալիրը, Այբ եւ թիվ 131 դպրոցները:

ՎիվաՍել-ՄՏՍ-ի գլխավոր տնօրեն Ռալֆ Յիրիկյանն ասել է, որ այս նախաձեռնությունը նպատակ ունի խրախուսել ռոբոտաշինության զարգացումը երկրում: “Մենք մտահոգված ենք ապագայի համար, հանուն կայուն եւ զարգացած ապագայի օժանդակում ենք հեռանկար ունեցող ծրագրեր: Հեռանկարային ծրագիր է փոքր տարիքից ռոբոտաշինության նկատմամբ հետաքրքրություն առաջացնելը”,-ասել է նա:

ԻՏՁՄ գործադիր տնօրեն Կարեն Վարդանյանն էլ ասել է, որ դպրոցներում ռոբոտաշինության խմբակների ձեւավորման շնորհիվ մեծ հաջողություններ են գրանցվում “Արմռոբոտիքս” բաց առաջնության շրջանակներում:

“Դպրոցականները սկսել են ավելի ակտիվ զբաղվել ռոբոտաշինությամբ: Մեր ջանքերն ուղղված են նրան, որ մոտակա տարիներին ավելի շատ դպրոցներ ունենան ռոբոտաշինության խմբակներ: Դրանք հետաքրքիր գործիքներ  են երեխաների ընդունակությունները բացահայտելու համար”,-ասել է Կարեն Վարդանյանը:

ԻՏՁՄ ներկայացուցիչ Հրաչյա Խաչատրյանը Մեդիամաքս-ի հետ զրույցում ասել է,որ ռոբոտները ամերիկյան արտադրության են, սակայն ծրագրվում է սեփական արտադրության նման կոմպլեկտներ պատրաստել, որոնք ավելի մատչելի կլինեն դպրոցների համար:

“Կոնստրուկտոր-ռոբոտները նախատեսված են դպրոցական տարիքի երեխաների համար եւ էլեկտրոնիկայի, մեխանիկայի եւ ծրագրավորման միջոցով նպաստում են ինժեներական մտքի զարգացմանը: Պարունակում են տարբեր տեսակի մասնիկներ, շարժիչներ, ատամնանիվներ  եւ ծրագրավորման մոդուլ, ինչի յուրացնելու դեպքում դպրոցականները կարող են իրենց ծրագիրը գրել”,-ասել է նա: