Երեւան /Մեդիամաքս/. «ԱրմենՏել» ընկերությունը (Beeline ապրանքանիշ) հաճախորդների սպասարկման որակի բարելավման ծրագրի շրջանակում Beeline վաճառքի եւ սպասարկման գրասենյակներում բացում է ինտերնետ ծառայությունների փորձարկման ցուցադրական գոտիներ:
Ցուցադրական գոտիները USB-մոդեմ ձեռք բերողներին կամ Hi Line ծառայությանը միանալ ցանկացողներին կօգնեն փորձարկել ինտերնետի արագությունը նախքան պայմանագիր կնքելը: Սարքը գնելուց հետո Beeline-ի մասնագետները, բաժանորդի պահանջներին համապատասխան, կիրականացնեն անհրաժեշտ կարգավորումները, Մեդիամաքս-ին հայտնել են ընկերության մամուլի ծառայությունում:
«Որպես կապի միասնական օպերատոր` «ԱրմենՏել» ընկերությունը ինտերնետ է տրամադրում տարբեր տեխնոլոգիաների միջոցով, իսկ այս ցուցադրական գոտիները մեր հաճախորդին հնարավորություն են ընձեռում ծանոթանալ առաջարկվող ծառայություններին եւ ընտրել իր պահանջներին համապատասխան արագություն եւ տեխնոլոգիա»,- նշել է «ԱրմենՏել»-ի գլխավոր տնօրեն Իգոր Կլիմկոն:
Ինտերնետային ծառայությունների փորձարկման ցուցադրական գոտիները տեղադրված են Beeline վաճառքի եւ սպասարկման 11 գրասենյակներում: Մոտ ապագայում ծառայության աշխարհագրությունը կընդլայնվի:
