«ՎիվաՍել-ՄՏՍ»-ի գլխավոր տնօրենը Արմավիրի համալսարանականներին ներկայացրել է հաջողության` սեփական փորձով ապացուցված ճանապարհը

Երեւան /Մեդիամաքս/. Արդյունավետ աշխատանքի համար անհրաժեշտ պայման է հարգանքի ու պատասխանատվության վրա հիմնված արժեքային համակարգով առաջնորդվելը, հասարակության բոլոր շերտերի նկատմամբ հոգածության դրսեւորումն ու զարգացման տեմպերին համընթաց գիտելիքների զինանոցի կատարելագործումը:

Ինչպես հաղորդում է ՄԵԴԻԱՄԱՔՍ-ը, այդ մասին երեքշաբթի Արմավիր համալսարանի ուսանողների հետ հանդիպման ընթացքում ասել է «ՎիվաՍել-ՄՏՍ»-ի գլխավոր տնօրեն Ռալֆ Յիրիկյանը:

«Նման մոտեցում որդեգրած կազմակերպությունը կարող է վստահ լինել, որ  դրական ազդեցությունն իրենց վրա պարտադիր զգալու են նաեւ բաժանորդները»,- նշել է Ռալֆ Յիրիկյանը:

«Երբ որեւէ ընկերություն բավարարվում է բիզնեսում բացառապես եկամուտ հետապնդելով, կարող է ակնկալել ընդամենը կարճաժամկետ հաջողություն: Առավել կարեւոր է, սակայն, երկարաժամկետ զարգացումը, որի ապահովման հարցում մեծ տեղ է զբաղեցնում, օրինակ, հաճախորդամետությունը: «ՎիվաՍել-ՄՏՍ»-ի համար  առաջնահերթություն է սպասարկման կենտրոնից գոհ հեռացող բաժանորդը` անկախ նրանից, թե նա սպասարկման կենտրոն է այցելել շնորհակալություն հայտնելու, բողոքելու, թե առաջարկության նպատակով»,- վստահեցրել է Ռալֆ Յիրիկյանը:

Ուսանողները պատկերացում կազմեցին արդյունավետ սպասարկման հիմնական նրբությունների եւ կորպորատիվ պատասխանատվության ընձեռած առավելությունների մասին եւ ստացան թեմային առնչվող շատ հարցերի պատասխաններ: