“Այբ”-ը ամփոփել է “Կենգուրու-2009” մրցույթի լրացուցիչ փուլի արդյունքները

Երեւան /Մեդիամաքս/. “Այբ” կրթական հիմնադրամն ամփոփել է “Կենգուրու-2009” միջազգային մաթեմատիկական մրցույթի լրացուցիչ փուլի արդյունքները:

Ինչպես այսօր ՄԵԴԻԱՄՍՔՍ-ին հայտնել են հիմնադրամի մամլո ծառայությունում, լրացուցիչ փուլում հաղթող են ճանաչվել Երեւանի “Քվանտ” վարժարանի 10-րդ դասարանի աշակերտ Հայկ Տեփանյանը եւ Ա. Շահինյանի անվան ֆիզիկամաթեմատիկական հատուկ դպրոցի 10-րդ դասարանի աշակերտ Արմինե Հովհաննիսյանը:

Հաշվի առնելով, որ մրցույթն առաջին անգամ էր կազմակերպվել Հայաստանում, “Այբ” կրթական հիմնադրամի ղեկավարության որոշմամբ հունիսի 6-ին անցկացվեց լրացուցիչ մրցույթ լավագույն արդյունք ցուցաբերած 14 աշակերտների միջեւ:

Հայկ Տեփանյանը եւ Արմինե Հովհաննիսյանը “Կենգուրու 2009” մրցույթի այս տարվա հաղթող Էռնա Պետրոսյանի հետ միասին ամռանը կմեկնեն Ռումինիա` “Կենգուրու առանց սահմանների” (Kangourou Sans Frontieres) ամառային ճամբար: