«Ստեղծագործական ճանաչողություն» խորագրի ներքո Գյումրու տեխնոլոգիական կենտրոնում կայացել է «Կանայք տվյալագիտության մեջ» (Women in Data Science/WiDS) ամենամյա միջոցառումը:
Միջոցառումը հնարավորություն է տվել ՀՀ տարբեր բնակավայրերից ժամանած ավելի քան 200 մասնակցի ծանոթանալու արհեստական բանականության հնարավոր կիրառությանն ապագայի աշխատաշուկայում` կարեւորելով այն աշխատանքային եւ ստեղծագործական գործընթացում:
Միջոցառման ընթացքում հրավիրյալ կին խոսնակների մասնակցությամբ տեղի են ունեցել բանախոսություններ, պանելային քննարկումներ, աշխատարաններ, ինտերակտիվ սեմինարներ, նախագծերի ցուցադրություններ, ինչպես նաեւ տարբեր ոլորտներում արդի տեխնոլոգիական լուծումների կիրառությամբ նոր փորձառությունների բացահայտում։ Միջոցառումը եզրափակվել է կին արվեստագետների յուրօրինակ ստեղծագործությունների ցուցահանդեսով։
«Մեր օրերում, երբ տեխնոլոգիաները շատ արագ զարգանում են, կարեւոր է ճիշտ հարցեր բարձրաձայնել։ Իսկ արվեստն օգնում է փոխել տեսակետն ու հարցադրումները դիտարկել այլ տեսանկյունից։ Այդ պատճառով էլ «Կանայք տվյալագիտության մեջ» միջոցառման հիմքում միջդիսցիպլինարությունն է՝ արվեստի, գիտության եւ տեխնոլոգիաների հատումը»,- նշել է Գյումրու տեխնոլոգիական կենտրոնի ղեկավար Բելլա Հարությունյանը։
«Կանայք տվյալագիտության մեջ» ամենամյա միջոցառումը կազմակերպվում է Սթենֆորդի համալսարանի համանուն համաշխարհային համաժողովի շրջանակում: Նմանատիպ միջոցառումներ են անցկացվում աշխարհի 200-ից ավելի քաղաքներում՝ տվյալագիտության ոլորտում կանանց էական դերակատարությունն ընդգծելու եւ կանանց կարողությունները հզորացնելու նպատակով: Հայաստանում այն արդեն ավանդաբար անցկացվում է «Ձեռնարկությունների ինկուբատոր» հիմնադրամի նախաձեռնությամբ։
10:59 | 03.07.23 |
Նորություններ
Twitter-ը սահմանափակել է օրական թվիթերի ընթերցման քանակը
13:59 | 30.06.23 |
Նորություններ
Reddit-ն սպառնում է հեռացնել բողոքող համայնքների մոդերատորներին
