BeeGraphy-ն մեկնարկում է 3D պարամետրիկ մոդելավորման ծրագրի թեստավորումը

Բիգրաֆի  ընկերությունը մեկնարկում է իր առաջնային պրոդուկտի՝ BeeGraphy Խմբագրիչի նոր տարբերակի բետա թեստավորման փուլը։

Խմբագրիչը առցանց 3D պարամետրիկ մոդելավորման ծրագրաշար է, որը թույլ է տալիս ստեղծել 2D եւ 3D մոդելներ՝ օգտագործելով վիզուալ ծրագրավորման մոտեցումը: Գտնվելով ամպային միջավայրում, այն հնարավորություն է  տալիս մասնագետներին մուտք գործել աշխատանքային միջավայր ցանկացած ժամանակ եւ ցանկացած վայրից:  

Համագործակցության գործառույթը թույլ է տալիս օպտիմալացնել հեռավար համատեղ աշխատանքի ողջ գործընթացը՝  իրական ժամանակում պարամետրիկ  ֆայլերի փոխանակումը (sharing), բազմակի օգտվողների կողմից խմբագրումները, համատեղ որոշումների ընդունումը եւ այլն:

Խմբագրիչի գործիքակազմը թույլ է տալիս ստեղծել բարդ հաշվողական մոդելներ, որոնք կարող են օգտագործվել 3D տպագրության, CNC արտադրության (թվային կառավարմամաբ հաստոցներ), ճարտարապետական եւ արդյունաբերական նախագծման  համար:

Տեւական ժամանակ մշակելով եւ կատարելագործելով ծրագրաշարը՝ Բիգրաֆին այժմ անցնում է թեստավորման բետա փուլին, որի նպատակն է հանրային փորձարկումը եւ հետադարձ կապը օգտագործողների հետ։   

Թեստավորման ընթացքում՝ այս տարվա ապրիլի 1-ից 3D մոդելավորողները, դիզայներները, ինժեներները, CAD ինդուստրիայի այլ մասնագետներ հասանելիություն կստանան Խմբագրիչի ողջ գործիքակազմին՝ անվճար փորձարկման եւ օգտագործման համար։

BeeGraphy խմբագրիչն աշխատում է բոլոր օպերացիոն համակարգերում, այդ թվում Windows, Mac, Linux, մոտ ապագայում այն համատեղելի կլինի նաեւ պլանշետների հետ:

Բիգրաֆի ստարտափը հիմնադրվել է 2021 թ-ին մի խումբ ինժեներների, մաթեմատիկոսների  եւ դիզայներների կողմից, որի նպատակն է ստեղծել եւ առցանց կիրառել պարամետրիկ մոդելավորման նորարարական լուծումներ։