17:46 | 26.10.22 | Ամենանորաձեւ IT գրասենյակները | exclusive 100863
Ամենանորաձեւ IT գրասենյակները. DataArt Armenia-ի նոր աշխատանքային միջավայրը
DataArt-ը ծրագրային ապահովման մշակման համաշխարհային ընկերություն է, որը յուրօրինակ մոտեցում է ցուցաբերում խնդիրների լուծմանը՝ օգնելով իր հաճախորդներին զարգացնել բիզնեսը տարբեր բնագավառներում:
Արդեն 3 տարի է Երեւանում գործում է ընկերության հայաստանյան մասնաճյուղը՝ DataArt Armenia-ն, որը վերջերս նոր գրասենյակ է բացել «Դվին» հյուրանոցային համալիրի տարածքում: iTel.am-ի թիմը շրջել է գրասենյակով, լուսանկարել ամենահետաքրքիր անկյուններն ու պատմում է՝ ինչպես է այնտեղ անցում աշխատակիցների առօրյան:
Գրասենյակը նախագծված է մինչեւ 500 աշխատակցի համար: «Օփեն սփեյս»-ում տեղերն ընտրվել են վիճակահանության սկզբուքնով: Տարածքը բաժանել են մի քանի գոտիների՝ LUCKY TEAM տառերի համապատասխանությամբ, համարակալել աշխատանքային սեղանները, որից հետո յուրաքանչյուր թիմ կամ անհատ պատահականության սկզբունքով հանել է իր տեղի հերթական համարը:
Տարածքի մեծության պատճառով աշխատակիցներն առաջին օրերին քարտեզից էին օգտվում: Դրանք մինչեւ հիմա էլ առկա են գրասենյակում, որպեսզի նորեկները եւս դժվարություններ չունենան:
Տարածքի ընդհանուր դիզայնում առանձնանում են բաժանարար տախտակները, որոնց վրա հայ աշխարհահռչակ գրոսմայստեր Տիգրան Պետրոսյանի հաղթական պարտիաներն են ներկայացված:
Դիզայնի յուրահատկությունն էլ ամբողջացնում են պատերին փակցված «DataArt IT Museum»-ի ցուցանմուշները:
Շրջելով գրասենյակի տարածքով՝ կարելի է հանդիպել ամենատարբեր աշխատանքային սեղանների՝ կանոնակարգված, կամ էլ աշխատանքային խառնաշփոթ ոճում, բույսերով կամ փափուկ խաղալիքներով զարդարված:
Հաճախ, աշխատանքային սեղանի տեսքը շատ բան կարող է ասել գործընկերոջ մասին:
Կարեւոր զանգերի, օնլայն հանդիպումների ժամանակ աշխատակիցները կարող են առանձնանալ մեկ հոգանոց աշխատասենյակ-խցիկներում, որը թույլ է տալիս ազատ խոսել՝ չխանգարելով մյուսների լռությունը: Այս խցիկները ունեն առանձին օդափոխության համակարգ, հնարավոր է կարգավորել նաեւ լույսի ուժգնությունը:
Բացի սեփական աշխատանքային սեղանից, գրասենյակում բազում այլ հատվածներ կան, որտեղ եւս աշխատելը հարմարավետ է:
Կան մի քանի հանգստի գոտիներ, բազմոցներ եւ սեղաններ, որոնց շնորհիվ աշխատանքային միջավայրից ձանձրանալը շատ դժվար է դառնում:
DataArt-ի գրասենյակում յուրաքանչյուրը կարողանում է գտնել իր համար ամենահարմարավետ անկյունը:
Թիմային քննարկումների, տարբեր հանդիպումների համար գրասենյակն ունի մի քանի meeting room-եր: Սենյակներն ունեն թափանցիկ պատեր, սակայն ցանկության դեպքում դրանք կարելի է ծածկել վարագույրներով:
Թե ինչպես անվանել այդ սենյակները, թիմը երկար է մտորել: Ի վերջո, որոշել են կանգ առնել հայկական սիրված մրգերի ու հատապտուղների անունների վրա՝ թութ, մոշ, բալ, ծիրան, թուզ, նուռ: Հանդիպման գնալիս այս անունները նաեւ տրամադրություն են հաղորդում, դե պատկերացրեք այսպես. «Մեկ ժամից հանդիպում ենք թուզում»:
Ավելի մեծաքանակ հանդիպումների, անձնակազմի հավաքների կամ սեմինարների համար օգտագործվում է ամֆիթատրոնի գոտին: Հյուրերին եւս այստեղ են ընդունում: Մնացած ժամանակ այն ազատ օգտագործվող տարածք է:
Փոքր-ինչ հոգնած աշխատակիցների համար համապատասխան լուծումը եւս կա: Վարագույրով առանձնացվող սենյակ-խցիկներում կարելի է մի փոքր «աչք կպցնել»: Դրանք առանց դռան անելը եւս միտում ունի. գուցե ինչ-որ մեկը շատ խորը քներ ու գործընկերները չկարողանային արթնացնել:
Տնօրենի ու փոխտնօրենի սենյակի համար եւս պետք էր տարբերվող անուն մտածել: Տարբերակներից մեկն այն «վերեւ» անվանելն էր, որ կատակը, թե «վերեւներից են ասել», ավելի դիպուկ լիներ:
Սակայն այս պարագայում գուցե որոշ մարդիկ հումորը լավ չհասկանային: Մյուս տարբերակը եւս շատ օրիգինալ էր, այդպես, երբ որեւէ մեկը հարցնում է, թե որտեղ են Արսենը կամ Իշխանը, պատասխանը շատ պարզ է հնչում՝ «Սենյակում»:
Գրասենյակի տարածքում ինքնագլոր եւս կա, սակայն սա ոչ այդքան տարածքում շրջելու, այլ ընդմիջմանը պոնչիկների հետեւից գնալու համար է: Աղջիկներն են նվիրել տղաներին փետրվարի 23-ի առթիվ, որ հեշտությամբ դրա վրա բարձեն պոնչիկներով կամ այլ քաղցրեղենով լի տոպրակները:
Ամեն հարկն ունի իր խոհանոցը, որոնք երկուսն էլ ակտիվ են օրվա գրեթե ցանկացած ժամի: Գործընկերներից շատերը, հաճախ, մյուսներին հրավիրում են խոհանոց՝ միասին մի քաղցր բան վայելելու:
Շատ աշխատակիցներ էլ գերադասում են գրասենյակի խոհանոցում անցկացնել նաեւ իրենց ուրբաթ երեկոները:
Եթե որեւէ մեկն ուտելիք է պատվիրել, որն ինչ-որ պատճառով չի ուտելու, հեշտությամբ կարող է հյուրասիրել գործընկերներին՝ «Eat me» ինքնակպչուն պիտակը փակցնելով դրա վրա: Հատկապես օրվա վերջում շատ սոված մեկը հաստատ երախտապարտ կլինի:
Խոհանոցում տեղադրված են նաեւ աղբի տեսակավորման տարաներ՝ պլաստիկի, թղթի եւ ապակու համար:
Աշխատանքին զուգահեռ սուրճ եւ թեյ նախընտրողների համար յուրաքանչյուր հարկում կա նաեւ սուրճի գոտի, որը շատ ավելի մոտ է, քան խոհանոցը:
«Lost and found box»-ն այստեղ շատ արդիական է, որովհետեւ մշտապես որեւէ մեկն ինչ-որ իր է թողնում գրասենյակի մի անկյունում, գործընկերներն էլ գիտեն՝ հետո որտեղ է փնտրելու:
Միասին հմտությունները զարգացնելն ավելի զվարճալի է: Անգլերեն նոր բառեր ու արտահայտություններ սովորելու համար կա Ducktionar-ն: Երբ աշխատակիցներից մեկն անգլերեն նոր բառի կամ արտահայտության է հանդիպում, այն գրի է առնում ու նետում արկղը: Որոշ ժամանակ հետո այն բացելու են ու գրատախտակի վրա գրեն բառերի նշանակությունները, որպեսզի անցնող-դարձողները հեշտությամբ մտապահեն դրանք:
Իսկ ինչ գրասենյակ, առանց հանգստի գոտու: DataArt-ում հանգստի գոտում կարելի է սեղանի թենիս խաղալ, բիլիարդ, սեղանի ֆուտբոլ կամ Platstation:
Այստեղ նաեւ կիթառ են նվագում կամ շախմատ խաղում:
Տարածքում նաեւ մարզասրահ կա, որն օր օրի համալրվում է նոր սարքավորումներով:
Գուցե հարց առաջանա, թե ինչքանով է հարմար աշխատասենյակում մարզասրահ հաճախելը: Այս մասին ընկերությունը եւս հոգացել է. գրասենյակը հագեցած է նաեւ ցնցուղներով:
Մեկ խոսքով՝ արված է ամեն ինչ, որ աշխատակիցներն իրենց զգան ինչպես տանը:
Գայանե Ենոքյան
Լուսանկարները՝ Էմին Արիստակեսյանի
11:49 | 27.11.15 |
Ամենանորաձեւ IT գրասենյակները
Ամենանորաձեւ IT գրասենյակները. VMware Հայաստան
