ՀՀ կրթության, գիտության, մշակույթի եւ սպորտի նախարարությունը մեկնարկել է «100 գաղափար Հայաստանի համար» նորարարական նախագծերի եւ գիտատեխնիկական մշակումների մրցույթի կազմակերպման աշխատանքները:
Մրցույթի նպատակն է զարգացնել երիտասարդների նորարարական մտածողությունը, ներգրավել երիտասարդներին Հայաստանի սոցիալ-տնտեսական զարգացման խնդիրների լուծման գործընթացներում, խթանել գիտատեխնիկական մշակումներն ու նորարարական նախագծեր իրականացնելու քաղաքացիական նախաձեռնությունները:
Մրցույթն անցկացվում է հետեւյալ անվանակարգերում՝
• ֆիզիկամաթեմատիկական գիտություններ,
• քիմիական գիտություններ,
• գյուղատնտեսական գիտություններ,
• ռազմական գիտություններ,
• տեղեկատվական տեխնոլոգիաներ։
Մրցույթին կարող են մասնակցել Հայաստանի եւ սփյուռքի 16-35 տարեկան երիտասարդներ կամ հեղինակային խմբեր:
Հայտերն ընդունվում են մինչեւ նոյեմբերի 5-ը ներառյալ: Հայտերն ուղարկել հնարավոր է այստեղ։
Մրցույթին ներկայացված գաղափարներից մրցութային հանձնաժողովը կընտրի լավագույն 5 գաղափարը, որոնց կտրվի դրամական պարգեւ՝ 500.000-ական դրամ:
Մրցութային հանձնաժողովը առավելությունը կտա այն գաղափարներին, որոնք կունենան՝
• կիրառական նշանակություն,
• ապահովում են ներկայացված գաղափարի շարունակականությունը,
• գաղափարն ունի հանրային մասնակցության բաղադրիչ,
• առաջարկում են միջգիտակարգային լուծումներ:
