Ամերիկյան համալսարանը տեխնոլոգիական զարգացմանը նպաստելու պլան է մշակել

Հայաստանի ամերիկյան համալսարանի և «Հայկական բարեգործական ընդհանուր միության» համատեղ նախաձեռնության շրջանակում մշակվել է գործողությունների պլան՝ 5 նպատակային ուղղություններով:

Այդ մասին ասել է Հայաստանի ամերիկյան համալսարանի ռեկտոր Կարին Մարկիդեսը՝ հյուրընկալելով ՀՀ կրթության, գիտության, մշակույթի և սպորտի նախարարի տեղակալ Կարեն Թռչունյանին:

Ըստ ԿԳՄՍ նախարարության հաղորդագրության, նա տեղեկացրել է, որ գործողությունների պլանը մշակվել է Հայաստանի տեխնոլոգիական էկոհամակարգի առաջխաղացմամբ հետաքրքրված շահառուների հետ անցկացված մի քանի տասնյակ հարցազրույցների արդյունքում:

Գործողությունների պլանի 5 նպատակային ուղղություններն են.

1.    Հայաստանի արհեստական բանականության հետազոտական կենտրոն;
2.    Առաջնորդության զարգացում;
3.    Կարողությունների զարգացում մարզային կլաստերներում;
4.    Ընդլայնված STEM կրթություն;
5.    Նախագծահեն ուսուցում ու նորարարական գործընթացներ:

Կարին Մարկիդեսն ասել է, որ ծրագրի նպատակն է ստեղծել բուհերի համագործակցության հարթակ եւ աշխատել առաջարկվող հինգ ուղղություններով՝ նպաստելով ՀՀ տեխնոլոգիական զարգացմանը: