ԲՏԱ նախարարը ծանոթացել է Հայաստանի օպերատորների միության ծրագրերին

ՀՀ բարձր տեխնոլոգիական արդյունաբերության նախարար Հայկ Չոբանյանն ապրիլի 23-ին ընդունել է Հայաստանի օպերատորների միության ներկայացուցիչներին:

Նախարարը կարեւորել է ոլորտային միությունների, ասոցիացիաների, նախաձեռնությունների ներկայացուցիչների հետ հանդիպումները, նշել, որ համագործակցության հիմնական սկզբունքը լինելու է ոլորտի վրա հենված աշխատանքը:

«Մեր խնդիրը իրական սպեկտրի զարգացումն է, որի վրա հենվելով պետք է առաջ գնալ։ 10 տարի առաջ ասոցիացիան էր զբաղվում այն նույն խնդիրներով, ինչով հիմա մենք։ Եվ, եթե այսօր մենք հաջողություն ունենք՝ միայն ոլորտի  շնորհիվ է․ ոլորտը եւ՛ ռազմավարությունն է մշակել, եւ՛ այն իրականացրել, եւ՛ բիզնեսով է զբաղվել, եւ՛ արժեք է ստեղծել»,- ասել է Հայկ Չոբանյանը՝ նշելով, որ ոլորտի ներկայացուցիչները պատրաստակամ են համագործակցելու, մեկ թիմում աշխատելու՝ բարձր նշաձող ապահովելու համար։  

Հայաստանի օպերատորների միության տնօրեն Քրիստինե Գյոնջյանը ներկայացրել է միության գործունեության նպատակները, հիմնական ուղղությունները, ընթացիկ ծրագրերն ու հետագա նախաձեռնությունները։

Նշվել է, որ բավական աշխատանք է կատարվել հեռահաղորդակցության ոլորտի օրենսդրական դաշտի բարելավման ուղղությամբ, մասնավորապես՝ «Տեսալսողական մեդիայի մասին» օրենքի ընդունման հարցում, «Էլեկտրոնային հաղորդակցության մասին» օրենքի մշակման, Համաշխարհային բանկի հետ համագործակցության շրջանակներում Լայնաշերտ ինտերնետի ռազմավարությունը մշակելու ուղղությամբ։ Ընթացիկ ծրագրերից նախարարին է ներկայացվել Երեխաների առցանց անվտանգության վերաբերյալ եւ ՀՊՏՀ-ի ուսանողների համար հեռահաղորդակցության ոլորտի մասնագիտացված դասընթացների անցկացումը, լայնաշերտ ինտերնետի քարտեզագրումը, ինտերնետ չունեցող բնակավայրերում հասանելիության ապահովումը։ Ներկայացված ծրագրերի շուրջ տեղի է ունեցել հանգամանալից քննարկում՝ դրանք առավել ընդգրկուն դարձնելու համար։

Պայմանավորվածություն է ձեռք բերվել սեղմ ժամկետներում կազմակերպել աշխատանքային քննարկում՝ Միության ներկայացուցիչների եւ Նախարարության համապատասխան ստորաբաժանումների պատասխանատուների մասնակցությամբ, քննարկել եղած խնդիրները, դրանց լուծման ուղղությամբ ներկայացնել առաջարկություններ, գտնել լուծման օպտիմալ տարբերակներ՝ նշելով կատարման ողջամիտ ժամկետներ։

Հայկ Չոբանյանը կարեւորել է  խնդիրներին լուծում տալու անհրաժեշտությունը. «Պետք է ոչ թե խնդիրների, այլ դրանց լուծումների վրա կենտրոնանալ։ Պետք է բերվի կոնկրետ փաթեթ՝ լուծումներով եւ իրավական հիմնավորումներով»,- ասել է նախարարը՝ ընդգծելով, որ այդ ուղղությամբ ինքն անձամբ հետեւողական է լինելու։