17:19 | 25.09.20 | Նորություններ | 1621

Արմեն Սարգսյանը՝ Հայաստանում նորարարությունների միջավայր ստեղծելու մասին

Հայաստանի նախագահ Արմեն Սարգսյանը նախօրեին այցելել է Հայաստանի գիտության եւ տեխնոլոգիաների հիմնադրամ (FAST):

Հիմնադրամի տնօրեն Արմեն Օրուջյանի ուղեկցությամբ նախագահ Սարգսյանը շրջել է հիմնադրամի գրասենյակում, զրուցել աշխատակիցների հետ, հետաքրքրվել նրանց գործունեության ուղղություններով եւ նախագծերով:

Հանրապետության նախագահին ներկայացվել են հիմնադրամի կրթական եւ գիտատեխնոլոգիական ոլորտի զարգացմանն ուղղված ծրագրերը, որոնց մի մասն իրականացվում է արտերկրի առաջատար գիտակրթական կենտրոնների հետ համագործակցաբար: Կենսատեխնոլոգիաների, մեքենայական ուսուցման, արհեստական բանականության եւ այլ բնագավառներում իրականացվող իրենց տարբեր հետազոտությունների մասին պատմել են ոչ միայն ծրագրերի մասնակիցները, այլեւ շահառուները:

Կարեւորելով իրականացվող ծրագրերն ու նախագծերը՝ նախագահ Սարգսյանը մասնավորապես նշել է․ «Մենք տեխնոլոգիաների զարգացման ոլորտում մեծ ներուժ ունեցող երկիր ենք, բայց լուրջ առաջընթաց եւ արդյունքներ արձանագրելու համար պետք է հետեւողական աշխատանք կատարենք: Մենք երկար ճանապարհի սկզբնամասում ենք»:

Նախագահն անդրադարձել է նաեւ Հայաստանում գիտատեխնոլոգիական զարգացմանն ուղղված ATOM նախագահական նախաձեռնությանը, որի շրջանակում համագործակցություն է նախատեսվում աշխարհի խոշորագույն տեխնոլոգիական ընկերությունների հետ: «Ամենաէականն այն է, որ այդ խոշոր ընկերությունները ներկայացված լինեն Հայաստանում եւ հետազոտական աշխատանք կատարեն:

Նրանցից մի քանիսը նույնիսկ առաջարկում են, որ համագործակցություն լինի ոչ միայն գիտահետազոտական, այլեւ կրթական ուղղությամբ,-ասել է նախագահ Սարգսյանը: -Իմ գաղափարը, նպատակը հետեւյալն է՝ Հայաստանում ստեղծել միջավայր, որ դուք ստիպված չլինեք նորարարություններին տեղեկանալու համար մեկնել դուրս, այլ դրանք գտնեք այստեղ, կապված լինեք մեր երկրի հետ»:

Անդրադարձ է կատարվել նաեւ ATOM-ի շրջանակում FAST-ի հետ գործակցությանը: «Գուցե մենք տարբեր բաներ ենք անում, բայց անում ենք նույն նպատակի համար: Մենք ունենք առաջնագծում լինելու հնարավորություն, եւ պետք է կարողանաք խելացի կերպով օգտագործել այդ հնարավորությունը»,- նշել է նախագահը:

Նախագահն ընդգծել է, որ այսօր ուժը հենց անհատի մեջ է, նրա ստեղծագործ ներուժը շատ մեծ է. «Ես հավատում եմ, որ 18 տարեկան պատանիները, որոնք նաեւ ձեր ծրագրերի շահառուների թվում են, կարող են շատ բան անել: Կարող են ավելին անել, եթե գնում են ճիշտ ուղղությամբ եւ ճիշտ միջավայրում են: Պետք է օգնել, որ նրանց փայլուն մտքերը իրականություն դառնան, եւ այդ առումով FAST-ը կարեւոր գործ է անում»:

Նախագահ Սարգսյանի եւ FAST-ի ղեկավար կազմի հանդիպման ընթացքում քննարկվել են նախագահական ATOM նախաձեռնության եւ FAST հիմնադրամի գործակցությանը վերաբերող հարցեր:

Անդրադարձ է եղել նաեւ այս տարի հոկտեմբերին նախատեսվող «Մտքերի հայկական գագաթնաժողով»-ի եւ գալիք տարի անցկացվելիք STARMUS 6-րդ փառատոնի շրջանակում փոխգործակցությանը: