Մեկնարկել են «Հայկական վիրտուալ կամուրջ»-ի աքսելերացիոն առաջին փուլի առցանց դասընթացները

Մեկնարկել են ՀՀ բարձր տեխնոլոգիական արդյունաբերության նախարարության եւ ՀԲԸՄ Սիլիկոնյան հովտի մասնաճյուղի նախաձեռնությամբ իրականացվող «Հայկական վիրտուալ կամուրջ» ծրագրի աքսելերացիոն առաջին փուլի առցանց դասընթացները:

8 շաբաթ տեւողությամբ դասընթացներն անցկացվելու են «Հայկական վիրտուալ քոլեջ» (AVC) հարթակում: Այս ընթացքում մասնակիցների համար Սիլիկոնյան հովտի առաջատար մասնագետներն ու ներդրումային ընկերությունների ղեկավարները, աշխարհի լավագույն համալսարանների դասախոսներն ու ամենահայտնի ընկերությունների հիմնադիրները գործնական դասեր են անցկացնելու՝ տրամադրելով մասնագիտական խորհրդատվություն:

«Հայկական վիրտուալ կամուրջ» ծրագրի Աքսելերացիայի առաջին փուլին մասնակցելու համար ստացվել էր ծրագրի չափորոշիչներին բավարարող 36 հայտ: Ընտրող հանձնաժողովի կազմը ձեւավորել է ՀԲԸՄ Սիլիկոնյան հովտի մասնաճյուղի մասնագիտական թիմը եւ ներգրավել է Սիլիկոնյան հովտում մեծ ճանաչում ունեցող միջազգային 5 մասնագետների: Դիմորդների հայտերի գնահատումն իրականացվել է 1-5 բալանոց համակարգով՝ ըստ 5 հիմնական չափորոշիչների:

Մրցույթի արդյունքում հաղթող են ճանաչվել 15 հաջողակ ընկերություններ՝ Expper, Embry Tech, CoinStats, RetentionForce, Hub Tech, Uraaa, payva, GebeCert, EasyDMARC, eSwap, 3dzook, Earlyone, Chessify, ForgeFiction-ը եւ Lucky Carrot:

Առաջին շաբաթների ընթացքում մասնակիցներն ուսումնասիրելու են Սիլիկոնյան հովտի էկոհամակարգը եւ բիզնես մոդելները, ստարտափների ստեղծման եւ զարգացման ճանապարհը, թե ինչպես եւ ինչից սկսել Սիլիկոնյան հովտում գործունեությունը: Ընկերությունները ձեռք են բերելու նաեւ բիզնես պլանի կազմման հմտություններ՝ շուկայում արդյունավետ գործունեության, ճիշտ ռազմավարության ձեւավորման, ֆինանսների կառավարման, թիմերի եւ հետազոտական աշխատանքների օպտիմալացման, շուկայում դիրքավորման, մրցակցությանը դիմակայելու, հաճախորդների հետ հարաբերությունների ձեւավորման, պահպանման եւ այլ ուղղություններով: 

Առանձին դասընթացների շարք նվիրված է ԱՄՆ֊ում բիզնեսի գրանցման եւ ֆինանսավորման, կորպորատիվ իրավական դաշտի եւ միջազգային հարկման համակարգերի  առանձնահատկություններին, միջազգային շուկաներ մուտք գործելու եւ բիզնեսի ընդլայնման հնարավորություններին: Մասնակիցները սովորելու են՝ ինչպես ստեղծել արժեքավոր առաջարկ եւ ինչպես այն արդյունավետ ներկայացնել պոտենցիալ ներդրողներին, ինչպես ստեղծել խոստումնալից բրենդ եւ ինչպես խուսափել տարածված սխալներից:

«Հայկական վիրտուալ կամուրջ» ծրագրի Աքսելերացիայի փուլում դասախոսելու եւ որպես մենթորներ հանդես են գալու խորհրդատու Բրետ Ուոթերսը, դասընթացավար Ջերի Քաֆեսինը, արտադրանքի եւ առաջնորդության խորհրդատու Սեմ Մաքաֆին, պրոֆեսոր Սալ Լուչիդոն, վենչուրային կապիտալիստ Հենրի Ուոնգը, աքսելերացիայի ֆակուլտետի դեկան Լին Նիքոլսը, վաճառքների տնօրեն Դեյվիդ Ուոլինգը,  խորհրդատու Էդվին Օհը,  Agile խորհրդատու Լաուրա Փովերսը, բիզնես քոուչ Միշել Մեսսինան,  մենթոր Յենս Վայցելը, ներդրող Կոլյա Ռեյսը, տեխնոլոգիական հարցերով փաստաբան Ջեյսոն Փաթնեմ Գորդոնը, միջազգային օրենսդրության փորձագետ  Ցզե Ժուն, գործարար Ջեֆ Ֆաուստը, ձեռներեց Նիլ Շրոֆֆը: