Վիվա-ՄՏՍ-ի աջակցությամբ ներդրված համակարգը նպաստում է համայնքային բյուջեի տնտեսմանը

Լոռու մարզի  Շնող  գյուղում արդեն մի քանի ամիս էներգախնայող համակարգ է գործում: Համայնքին աջակցել են գյուղական վայրերում ենթակառուցվածքներ զարգացնող գործընկերները՝ Վիվա-ՄՏՍ-ն ու Վայրի բնության ու մշակութային արժեքների պահպանման հիմնադրամը (FPWC):

Նոր տեխնոլոգիաներով աշխատող՝ LED լուսատուներն արդեն ապահովում են ցանկալի արդյունք. ամսվա կտրվածքով՝ համայնքի ծախսերը կրճատվել են:

«Մինչեւ համակարգի ներդրումը կատարել ենք հաշվարկներ: Ամսվա կտրվածքով, փողոցների լուսավորության համար ծախսվել է 80-85 հազար դրամ: Դա միայն ծախսած էներգիայի համար վճարվող գումարի չափն է: Եթե հաշվի առնենք նաեւ հին լուսամփոփների հետ կապված խնդիրները՝ ժամանակից շուտ շարքից դուրս գալն ու հավելյալ ծախսերը, ապա ավելի պարզ պատկեր կստացվի: Այժմ այդ խնդիրներն այլեւս չկան: Նոր համակարգի շահագործման արդյունավետությունն ակնհայտ է: Այժմ, նույն նպատակի եւ տարածքի համար, ամսական ծախսը կազմում է առավելագույնը 51 հազար դրամ: Ամսվա ընթացքում տնտեսվում է 30-35 հազար դրամ»,-ասել է Շնող խոշորացված համայնքի ղեկավար Դավիթ Ղումաշյանը:

Նախատեսված ծրագրով, Շնողում պետք է լուսավորվեր շուրջ 1,4 կմ երկարությամբ հատված: Ներդրումներ կատարելու՝ համայնքի պատրաստակամության շնորհիվ, այդ ցուցանիշն այժմ այլ է: Լուսավորվել է կենտրոնական ամբողջ փողոցը, որը կազմում է 1,7 կմ: Տեղադրվել է էներգախնայող 47 LED լուսարձակ: Նոր համակարգն արդեն գործարկվել է, իսկ պաշտոնական բացմանը փոխարինել է տեսազանգով «մասնակցելու» ձեւաչափը:

«Այս էներգախնայող համակարգի արդյունավետությունը երկարաժամկետ է լինելու: Դա ամենակարեւոր ձեռքբերումներից է: Մենք դրական արձագանք ենք ստացել այն գյուղերից, որտեղ իրականացրել ենք ծրագիրը: Դուք եւս, ժամանակի ընթացքում, կզգաք նոր տեխնոլոգիաների առավելությունը. կխնայվեն միջոցներ: Եթե համայնքներին հաջողվի խնայված միջոցներն ուղղել մյուս խնդիրների լուծմանը՝ աստիճանաբար հնարավոր կլինի դրական փոփոխություն արձանագրել տարբեր հատվածներում: Դա ծախսերի արդյունավետ կառավարման կարեւոր բաղադրիչ է»,- տեսազանգի ժամանակ ասել է Վիվա-ՄՏՍ-ի գլխավոր տնօրեն Ռալֆ Յիրիկյանը:

«Ժամանակի պահանջից ելնելով, մենք փոխել ենք ծրագրի ավարտը ներկայացնելու ձեւաչափը, սակայն նպատակը՝ Էկոգյուղերի ցանցի ստեղծումն ու զարգացումը, մնացել է նույնը: Այս համայնքը շուրջ 30%-ով մասնակցել է ծրագրի իրականացմանը, որի շնորհիվ ավելի մեծ տարածք է ներգրավվել իրականացվող նախագծում: Դա եւս կարեւոր ձեռքբերում է»,-ասել է Վայրի բնության եւ մշակութային արժեքների պահպանման հիմնադրամի հիմնադիր Ռուբեն Խաչատրյանը:

LED լուսատուները խնայողության, բնապահպանական արդյունքի եւ լույսի որակի տեսանկյունից, առայժմ անգերազանցելի են: Հայաստանի հեռավոր մարզերը շարունակում են մնալ գործընկեր կառույցների ուշադրության կենտրոնում: Առկա խնդիրների լուծման համար, շատ բնակավայրերում աշխատանքները համակարգվում են տարիների կտրվածքով: