Ucom-ը թողարկում է դոլարային եւ դրամային պարտատոմսեր` 7.5% եւ 11% եկամտաբերությամբ

Ucom սահմանափակ պատասխանատվությամբ ընկերության համահիմնադիր եւ գլխավոր տնօրեն Հայկ Եսայանն այսօր ազդարարել է դոլարային եւ դրամային պարտատոմսերի թողարկման մասին։

Պարտատոմսերի թողարկման ծավալը կազմում է $5 մլն՝ 7,5% տարեկան եկամտաբերությամբ եւ 250 մլն ՀՀ դրամ՝ 11% տարեկան եկամտաբերությամբ։

36 ամիս մարման ժամկետով անվանական արժեկտրոնային պարտատոմսերը տեղաբաշխվելու են «Արմենբրոկ» բաց բաժնետիրական ընկերության միջոցով 2019 թ․ մայիսի 16-ից հուլիսի 15-ն ընկած ժամանակահատվածում։ Թողարկման արդյունքում ներգրավված միջոցներով Ucom-ը շարունակելու է կապիտալ ներդրումների իրականացումը ֆիքսված եւ շարժական կապի իր բաժանորդներին նորարարական տեխնոլոգիական լուծումներով ապահովելու համար:

Մեկ պարտատոմսի անվանական արժեքն է $100 եւ 100 000 ՀՀ դրամ։ Ucom պարտատոմսեր կարող են ձեռք բերել բոլոր հետաքրքրված ֆիզիկական եւ իրավաբանական անձինք։ Արժեկտրոնների վճարման հաճախականությունը լինելու է եռամսյակային։

«Պարտատոմսերի թողարկումով Ucom-ը ոչ միայն դիվերսիֆիկացնում է իր վարկային գործիքները, այլեւ վերահաստատում է իր հավատարմությունը հրապարակային ընկերություններին բնորոշ թափանցիկ, հաշվետվողական գործելաոճին՝ դառնալով ավելի բաց ու գրավիչ ներդրողների համար եւ առաջին քայլն անելով դեպի միջազգային կապիտալի շուկա։ Հատկանշական է նաեւ, որ այս քայլով մենք բաժանորդների հետ շփման նոր մշակույթ ենք ձեւավորում՝ հնարավորություն ընձեռելով եկամուտ ստանալ այն ընկերությունից, որի կողմից մատուցվող ծառայությունների համար նրանք վճարում են։ Այսինքն` բաժանորդներն իրենց մասնակցությամբ կնպաստեն նորարարական տեխնոլոգիաների ներդրմանը եւ իրենց իսկ կողմից օգտագործվող ծառայությունների որակի բարձրացմանը։ Ընդգծեմ, որ Ucom պարտատոմսերի գրավչությունը պայմանավորված է Հայաստանի բանկային համակարգում գործող ավանդային տոկոսադրույքների համեմատ առավել բարձր տոկոսադրույքով եւ մեր ընկերության կայուն ֆինանսական ցուցանիշներով», - նշել է Ucom ընկերության համահիմնադիր եւ գլխավոր տնօրեն Հայկ Եսայանը։

Ucom-ի համահիմնադիրը համոզված է, որ ոչ ֆինանսական սեկտորի ընկերությունների կողմից կորպորատիվ պարտատոմսերի թողարկումը կաշխուժացնի պարտատոմսերի շուկան, կավելացնի Հայաստանի Հանրապետության ներդրումային պոտենցիալը եւ կնպաստի երկրի տնտեսության զարգացմանը։

«Պարտատոմսերը բավականին գրավիչ արժեթղթեր են ինչպես փորձառու, այնպես էլ սկսնակ ներդրողների համար: Դրանք ոչ միայն ապահովում են ֆիքսված բարձր եկամուտ, այլ նաեւ բանկային ավանդների համեմատ ավելի ճկուն գործիք են, քանի որ ներդրողը կարող է գնված արժեթղթերը կամ դրանց մի մասը ցանկացած պահի վաճառել երկրորդային շուկայում՝ առանց կուտակված եկամուտը կորցնելու: Իսկ մասնավորապես Ucom-ի պարտատոմսերը հավակնում են դասվել արժեթղթերի շուկայի ամենագրավիչ եւ հետաքրքիր գործիքների շարքում: Առաջնային տեղաբաշխման ավարտից հետո Ucom պարտատոմսերը շրջանառելու են Հայաստանի ֆոնդային բորսայում, որտեղ Արմենբրոկը ստանձնելու է նաեւ այս արժեթղթերի շուկա ստեղծողի դերը, ապահովելով նրանց մշտական իրացվելիությունը», - նշել է «Արմենբրոկ» ԲԲԸ գլխավոր տնօրեն Արամ Կայֆաջյանը։

Հավելենք, որ պարտատոմսերի ձեռքբերման համար ֆիզիկական անձինք պետք է տեղաբաշխողին՝ «Արմենբրոկ» ներդրումային ընկերությանը (Տիգրան Մեծ պ. 32/1) ներկայացնեն անձնագիր եւ սոցիալական քարտ, կամ նույնականացման քարտ, ինչպես նաեւ ՀՀ որեւէ բանկում բացված դրամային եւ դոլարային հաշվեհամարները։ Նշյալ տեղաբաշխողը ներկայացուցիչ կունենա նաեւ Ամիրյան 4/7 հասցեում գտնվող Ucom-ի սպասարկման կենտրոնում։