Մայիսի 20–ին՝ Ա. Շահինյանի անվան ֆիզիկամաթեմատիկական հատուկ դպրոցում, Տեխնովացիա Հայաստան 2019 ծրագրի շրջանակում ընտրված 20 կրտսեր թիմերը կներկայացնեն իրենց հավելվածները ժյուրիի դատին:
Այս տարի ավելի քան հինգ հարյուր 10-18 տարեկան աշակերտուհիներ եւ մենթորներ/ուսուցչուհիներ Հայաստանի բոլոր մարզերից մասնակցել են ծրագրին:
Ծրագրի շրջանակում այս տարի Հայաստանի աղջիկների թիմերի կողմից 51 հավելված է ստեղծվել:
Հայաստանյան մրցույթին մասնակցել է 49 թիմ՝ 9 մարզերից; 14 ժյուրիի անդամներ տեխնոլոգիական, բիզնես ընկերություններից եւ ուսումնական հաստատություններից գնահատել են թիմերի աշխատանքները: Հայաստանյան մրցույթի արդյունքները հայտնի կդառնան հունիսի 2–ին:
Տեխնովացիա Հայաստան մրցույթին աջակցում են Տեղեկատվական եւ հաղորդակցության տեխնոլոգիաների գործատուների միությունը, ՄԱԿ-ի հայաստանյան գրասենյակը, Սինոփսիս Արմենիա ընկերությունը, Յունիքոմփ ընկերությունը, Հայաստանի ամերիկյան համալսարանը, Ձեռնարկությունների ինկուբատոր հիմնադրամը, Ֆիզմաթ դպրոցը, Արարատ բանկը, Վոլտերման եւ Օնեքս ընկերությունները: Ավագ թիմերի մրցանակների հովանավորն է Սերվիս տիտան ընկերությունը:
Ծրագիրը ֆինանսավորվել է ԱՄՆ պետքարտուղարության Հասարակայնության հետ կապերի գրասենյակի դրամաշնորհի շրջանակներում:
Տեխնովացիան աշխարհի տեխնոլոգիական ձեռներեցության խոշորագույն մրցույթն է 10-18 տարեկան աղջիկների համար: Ծրագրի նպատակն է ոգեւորել եւ հզորացնել երիտասարդ աղջիկներին՝ դառնալու նորարարներ եւ առաջնորդներ իրենց համայնքներում` լուծելով իրենց համայնքների խնդիրները, ստացած ձեռներեցության եւ տեխնոլոգիական գիտելիքների միջոցով:
12 շաբաթյա ուսուցման ընթացքում մասնակիցներին սովորեցնում են հինգ մոդուլներ` գաղափարների գեներացիա, ծրագրավորում, բիզնես, շուկայի հետազոտում եւ ներկայացում:
Արդյունքում թիմերը մենթորների ուղղորդմամբ, բացահայտում են որեւէ սոցիալական խնդիր իրենց համայնքում եւ պատրաստում բջջային հավելված` լուծելու այդ խնդիրը:
Երրորդ տարին է ինչ Հայաստանը մասնակցում է ծրագրին: Այն Հայաստանում իրականացնում են Կրթության ազգային ինստիտուտը եւ Կանայք եւ տեղեկատվական հասարակություն հկ-ն գործընկեր եւ աջակից կազմակերպությունների հետ:
16:54 | 16.05.19 |
Նորություններ
DISQO-ի հայաստանյան թիմն ընդլայնվում է
