Հայտնի են ՆԱՍԱ-ի Space Apps Challenge հայաստանյան հաքաթոնի հաղթողները

Ապրիլի 23-ին ամփոփվել են ՆԱՍԱ-ի Space Apps Challenge 2016-ի շրջանակում Հայաստանում առաջին անգամ անցկացված լոկալ հաքաթոնի արդյունքները:

Itel.am-ին հաքաթոնի հայաստանյան ներկայացուցիչ X-Tech Creative Studios ընկերության համահիմնադիր եւ գլխավոր տնօրեն Արման Աթոյանը տեղեկացրել է, որ Բյուրականի աստղադիտարանում անցկացված 24-ժամյա հաքաթոնին մասնակցել է 11 թիմ:

Հաքաթոնի հաղթող է ճանաչվել MARS LIVE նախագիծը:

Թիմը ստեղծել է մոբայլ հավելված, որը թույլ է տալիս մարդկանց գաղութի սիմուլյացիա ներկայացնել Մարսի վրա:

GPS համակարգի համադրումով օգտվողը տեսնում է իր դիրքը Մարսի վրա, կարող է ստանալ եւ կատարել առաջադրանքներ, հաղորդակցվել այլ մարդկանց հետ, որոնք օգտվում են հավելվածից: Հավելվածն օգտվում է մի շարք API-ներից եւ իր մեջ հավաքում մեծաքանակ անհրաժեշտ ինֆորմացիա:

Արման Աթոյանի փոխանցմամբ՝ հաղթող թիմը Softline ընկերության կողմից նվեր է ստացել Samsung Galaxy S7 եւ GearVR սաղավարտ:

Երկրորդ հորիզոնականը զբաղեցրել է PEPERONI թիմը, որը ներկայացրել է 2 նախագիծ:

Առաջին նախագիծը դրոնների կառավարման տեղեկատվական պլատֆորմ է՝ նախատեսված դռոնների թռիչքի անվտանգությունն ապահովելու համար:



Երկրորդ նախագիծն իրենից ներկայացնում է հատուկ երաժշտական հավելված՝ տիեզերագնացների սրտի աշխատանքը մոնիտորինգ անելու համար:

Ultimate Space Simulator նախագիծն էլ զբաղեցրել է 3-րդ տեղը:



Թիմը Unreal Engine 4-ի միջոցով մշակել էր դեպի Մարս ճանապարհորդության սիմուլացիա՝ 3D միջավայրում ստանալով գաղութ Մարսի վրա:

Նարինե Դանեղյան