Էլոն Մասկը ցանկանում է միավորել մարդկային ուղեղն ու համակարգիչը

Tesla եւ SpaceX ընկերությունների հիմնադիր Էլոն Մասկը գործարկում է Neuralink նախագիծը, որի նպատակն է ձեւավորել մարդկային ուղեղը համակարգչին միացնող համակարգեր:

The Wall Street Journal-ի հաղորդմամբ՝ նոր համակարգը նախատեսում է մարդկային ուղեղում էլեկտրոդների տեղակայում, որն արհեստական եւ մարդկային բանականության միջեւ մշտական կապ կապահովի: Համակարգը թույլ կտա նաեւ հաշվել մարդկային ուղեղից ստացվող տվյալները, դրանք ձայնագրել թվային կրիչների վրա եւ ընդհակառակը:

Նախագծի հեղինակներն ակնկալում են, որ Neuralink-ի մշակած լուծումները կընդլայնեն մարդկային բանականության հնարավորությունները եւ կբուժեն մի շարք հիվանդություններ, ինչպիսիք են էպիլեպսիան եւ պարալիչը:

The Wall Street Journal-ի աղբյուրները փոխանցում են, որ նախնական փուլում Neuralink-ը կմշակի թեստային նախագիծ՝ տեխնոլոգիայի աշխատունակությունն ապացուցելու նպատակով, ապա կգործարկի ավելի խոշորամասշտաբ համակարգեր:

Նորաստեղծ ընկերությունն արդեն աշխատանքի է ընդունել առաջատար գիտնականների, իսկ ֆինանսավորում գտնելու նպատակով Էլոն Մասկը բանակցում է PayPal-ի հիմնադիր Փիթեր Թիլի Founders Fund-ի հետ: