ՎիվաՍել-ՄՏՍ-ը Կենդանաբանական այգում ստեղծվել է օպտիկամանրաթելային ցանց

Երեւանի կենդանաբանական այգու տարածքում պաշտոնապես ազդարարվել է գերարագ Wi-Fi գոտու ընդլայնման եւ օպտիկամանրաթելային ցանցի գործարկման մասին:

ՎիվաՍել-ՄՏՍ-ի կողմից տրամադրվող անվճար Wi-Fi կապի միջոցով այցելուները, տպագիր ցուցանակներից բացի, հնարավորություն կունենան օգտվելու այգու էլեկտրոնային  ինտերակտիվ քարտեզներից եւ ուղեցույցներից:

«Կենդանաբանական այգու ողջ տարածքում գործող Wi-Fi գոտում այցելուները կկարողանան անխոչընդոտ այցելել այգու պաշտոնական կայք, ծանոթանալու լրահոսին եւ դիտելու այգու եւ նրա բնակիչների մասին պարբերաբար թարմացվող տեսանյութերը:

Օպտիկամանրաթելային ցանցի ստեղծումը նաեւ հնարավորություն կտա գործարկել կենդանիների մասին պատմող ցուցատախտակների վրա տեղադրված QR կոդերը (մատրիցային կամ եռաչափ շտրիխկոդ): Համապատասխան ծրագիր ունեցող այցելուները կարող են վայրկյանների ընթացքում ստանալ տվյալ կենդանատեսակի մասին բազմաֆորմատ ինֆորմացիա: Առանձին աուդիո փաթեթներ կմշակվեն տեսողական խնդիրներ ունեցող անձանց համար»,- ասված է հաղորդագրությունում:

ՎիվաՍել-ՄՏՍ-ում նշել են, որ օպտիկամանրաթելային ցանցի կառուցումը հնարավոր է դարձել Ռալֆ Յիրիկյանի անձնական՝ 3.8 միլիոն դրամի ներդրման շնորհիվ: Վայրի բնության եւ մշակութային արժեքների հիմնադրամը (FPWC) նույնպես մասնակցել է նախագծին՝ հատկացնելով եւս 3.8 միլիոն դրամ:

«Վերջին շրջանում կատարված բարեփոխումներից հետո Երեւանի կենդանաբանական այգին իրապես դարձել է էկոկրթական, դաստիարակչական կարեւոր կենտրոն, որտեղ երեխաները սովորում են հոգ տանել բնության, կենդանիների մասին, համալրում են իրենց գիտելիքներն այս բնագավառում, մասնակցում են հետաքրքրասիրություն եւ առողջ ապրելակերպ խրախուսող միջոցառումների, դիտում են ուսուցողական ֆիլմեր: Բնական է, որ այդ ամենը պատշաճ կերպով կազմակերպելու, առավել գունեղ դարձնելու եւ շրջայցերը տեխնիկական միջոցներով առավել հյարմարավետ դարձնելու համար անհրաժեշտ է ինտերնետ հասանելիություն: Որպես մասնավոր անձ՝ ես ուրախ եմ աջակցելու կենդանաբանական այգու նախաձեռնություններին:

Օպտիկամանրաթելային ցանցի կառուցումը հնարավորություն է ընձեռում այգու տարածքով մեկ գործարկել տեսախցիկներ, ինչպես նաեւ էականորեն ընդլայնել անվճար Wi-Fi կապի հասանելիությունը»,- ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը: