Երեւան /Մեդիամաքս/. «Կենգուրու 2009» միջազգային մաթեմատիկական մրցույթի երեք հայ հաղթողներն այսօր մեկնեցին Ռումինիա` մասնակցելու միջազգային ամառային ճամբարին:
Ինչպես ՄԵԴԻԱՄԱՔՍ-ին հայտնել են «Այբ» կրթական հիմնադրամի մամլո ծառայությունում, ամառային ճամբարում հայ դպրոցականները մասնակցելու են տարբեր խաղ-մրցույթների:
Ուղեւորությունը հնարավոր է դարձել «Կենգուրու 2009»-ի գլխավոր գործընկեր «ՎՏԲ-Հայաստան բանկի» շնորհիվ: Օրերս «ՎՏԲ-Հայաստան բանկը» մրցանակներ է հանձնել մրցույթի երեք հաղթողներին. Էռնա Պետրոսյանին` 500 հազ. դրամ գումարի չափով ավանդ, Արմինե Հովհաննիսյանին եւ Հայկ Տեփանյանին` 250 հազարական դրամ գումարի չափով ավանդներ:
Հայաստանում «Կենգուրու» մրցույթի բացառիկ կազմակերպիչը «Այբ» կրթական հիմնադրամն է: Մրցույթն անցկացվում է ՀՀ կրթության նախարարության հովանու ներքո:
