Իլոն Մասկի SpaceX-ը ձեռք է բերել xAI-ը՝ տիեզերքում տվյալների կենտրոններ կառուցելու համար

Իլոն Մասկի SpaceX-ը հայտարարել է xAI-ը ձեռք բերելու մասին, որը նաեւ X սոցիալական ցանցի սեփականատերն է։

Bloomberg-ի աղբյուրների համաձայն՝ գործարքը տիեզերական ընկերությանը կգնահատի 1.25 տրիլիոն դոլար։

xAI-ի ձեռքբերման մասին հայտարարությունը SpaceX կայքում հրապարակել է Իլոն Մասկը։ Նա նշել է, որ գործարքն անհրաժեշտ է «Երկրի վրա եւ դրանից դուրս ամենաամբիցիոզ, ուղղահայաց ինտեգրված նորարարական կենտրոնը» ստեղծելու համար, որը կմիավորի արհեստական բանականությունը, հրթիռները, արբանյակային ինտերնետը եւ տեղեկատվության փոխանակման հարթակը։

AI-ի ոլորտում ներկայիս առաջընթացը կախված է մեծ, գետնի վրա հիմնված տվյալների կենտրոններից, որոնք պահանջում են հսկայական քանակությամբ էլեկտրաէներգիա եւ սառեցում։ AI-ի համար էլեկտրաէներգիայի համաշխարհային պահանջարկը մոտ ապագայում չի կարող բավարարվել երկրային լուծումներով՝ առանց տեղական համայնքների եւ շրջակա միջավայրի համար դժվարություններ ստեղծելու։

Ես գնահատում եմ, որ 2-3 տարվա ընթացքում տիեզերքը կլինի արհեստական բանականության համար հաշվողական հզորություն ստեղծելու ամենաէժան միջոցը։ Միայն այս ծախսարդյունավետությունը նորարարական ընկերություններին հնարավորություն կտա աննախադեպ արագությամբ եւ մասշտաբով առաջ մղել իրենց AI մոդելների ուսուցումը եւ տվյալների մշակումը՝ արագացնելով ֆիզիկայի մեր ընկալման եւ մարդկության օգտին տեխնոլոգիաների գյուտի առաջընթացները»,- նշել է Իլոն Մասկը։

SpaceX-ը նախատեսում է ամեն տարի «միլիոնավոր տոննա» օգտակար բեռ հասցնել ուղեծիր՝ օգտագործելով Starship հրթիռները: Մասկի խոսքով՝ մեկ տոննայի համար 100 կՎտ հաշվողական հզորություն արտադրող արբանյակների արձակումը տարեկան կավելացնի 100 ԳՎտ հաշվողական հզորություն արհեստական բանականության համար՝ առանց որեւէ շարունակական շահագործման կամ սպասարկման աշխատանքների։

SpaceX-ի համար ուղեծրային տվյալների կենտրոնների ստեղծումը կլինի գերակա խնդիր: Միեւնույն ժամանակ, ընկերությունը կշարունակի զարգացնել Starlink արբանյակային ցանցը եւ պահպանել «այլ մոլորակներ» առաքելությունների ծրագրերը:

«Տիեզերքում հիմնված տվյալների կենտրոնների կողմից բացվող հնարավորությունները կօգնեն ֆինանսավորել եւ աջակցել Լուսնի վրա ինքնաբավ բազաների, Մարսի վրա քաղաքակրթության զարգացմանը եւ տիեզերքի ընդլայնմանը»,- հավելել է Մասկը:

SpaceX-ի եւ xAI-ի միջեւ գործարքը միայն բաժնետոմսերի փոխանակում է: 2026 թվականի սկզբին լրատվամիջոցները սկսեցին հաղորդել SpaceX-ի IPO-ի ծրագրերի մասին: Հունվարի վերջին Reuters-ը եւ Bloomberg-ը հայտնեցին, որ SpaceX-ը քննարկում է Մասկի սեփականության տակ գտնվող այլ ընկերությունների հետ միաձուլման հնարավորությունը իր առաջիկա IPO-ից առաջ։