Հայկական «մեծ եռյակը» 2025-ին

2025 թվականին Հայաստանի հեռահաղորդակցության ոլորտի «մեծ եռյակը»՝ Ucom-ը, Team Telecom Armenia-ն եւ Viva-ն, ոչ միայն նոր պրոդուկտներ ու ծառայություններ էին շուկա հանում, այլեւ լրջորեն վերազինում էին իրենց ցանցերը: 

Itel.am ամփոփել է «մեծ եռյակի» 2025-ը՝ ինչ փոփոխություններ են իրականացրել օպերատորները այս տարի եւ ինչպես են դրանք անդրադառնալու Հայաստանի կապի ու թվային ենթակառուցվածքների ապագայի վրա։

Ucom

5G ցանցի լայնածավալ տեղակայում

Նոյեմբերին Ucom-ը հայտնեց, որ ավարտել է 5G ցանցի տեղակայումը Հայաստանի բոլոր քաղաքներում: Ծածկույթն այժմ հասանելի է 48 քաղաքում, հարյուրավոր գյուղական համայնքներում, Երեւան-Դիլիջան մայրուղու վրա, Բաղրատաշեն, Բավրա եւ Ագարակ սահմանային անցակետերում: 

Ռազմավարական համագործակցություններ

Ucom-ը ռազմավարական համագործակցություններ է հաստատել խոշոր մատակարարների հետ՝ Nokia-ի, MediaKind-ի եւ Cerillion-ի։ Վերջինիս հետ Ucom-ն սկսել է ընկերության հաշվառման համակարգի (billing) ամբողջական փոխարինման գործընթացը։

UPlay՝ ժամանցի նոր դարաշրջան

Ապրիլին Ucom-ը գործարկել է UPlay հարթակը, որը միավորում է բարձրորակ տեսաբովանդակություն եւ ժամանակակից տեխնոլոգիաներ՝ բաժանորդներին ապահովելով լայն ընտրանի հեռուստաալիքներ եւ մուլտիմեդիա բովանդակություն:

***

Team Telecom Armenia

5G կապի գործարկում Գյումրիում եւ Վանաձորում

Team Telecom Armenia-ի 5G ցանցը գործարկվել է Գյումրիում եւ Վանաձորում: Ցանցի վերազինումն իրականցվում է նաեւ միջպետական ճանապարհներին՝ ապահովելով կապի ծառայությունների հուսալիություն նաեւ երթեւեկության ընթացքում։ 

Team-ի 5G ցանցն արդեն իսկ հասանելի է հանրապետության երեք խոշորագույն քաղաքներում:

Հուշագիր ԱԲ ենթակառուցվածք կառուցելու մասին

Հունիսին ԱԲ ամպային ծառայություններ մատուցող Firebird ընկերությունը, Հայաստանի կառավարությունը, NVIDIA-ն եւ Team Group-ը հայտարարեցին Հայաստանում համատեղ առաջադեմ ԱԲ ենթակառուցվածք կառուցելու մասին։

Նախագծի շրջանակում կիրականացվի 500 միլիոն դոլարի ներդրում, կտեղակայվեն հազարավոր NVIDIA Blackwell GPU-ներ, կձեւավորվի ավելի քան 100 մեգավատտ հզորությամբ ենթակառուցվածք:

Կենտրոնի գործարկումը նախատեսվում է 2026 թվականին։

Նախագծի մասին iTel.am-ին տված բացառիկ հարցազրույցում պատմել էր Team ընկերությունների խմբի համահիմնադիր Հայկ Եսայանը:

2G ցանցի անջատում եւ արդիական տեխնոլոգիաների ապագա

2025 թվականին Team Telecom Armenia նախաձեռնել է լայնածավալ նախագիծ՝ ամբողջովին դադարեցնելու 2G ցանցի շահագործումը՝ փոխարինելով այն ժամանակակից տեխնոլոգիաներով (4G/5G)։ Սա տարածաշրջանում միացյալ քայլ է՝ ուղղված կապի որակի եւ թվային անվտանգությունը բարձրացնելուն։ Ընկերությունը գործարկել է հատուկ ծրագիր՝ հին 2G հեռախոսները նոր, 3G/4G աջակցող սմարթֆոններով փոխարինելու նպատակով։

Ericsson-ի հետ ռազմավարական համագործակցություն

Մարտին Team Telecom Armenia-ն եւ Ericsson-ը ստորագրել են փոխըմբռնման հուշագիր՝ ռազմավարական համագործակցության վերաբերյալ: Նպատակը ցանցային ենթակառուցվածքի զարգացումն է եւ նորարարական լուծումների ներդրումը:

***

Viva

$ 150 միլիոն դոլարի ներդրում՝ առաջիկա երեք տարում

Հուլիսի 1-ին Viva-ն նշեց հիմնադրման 20-րդ տարին: 

Ներկայացնելով ընկերության վերափոխումը, Viva-ի բաժնետեր Կոնստանտին Սոկոլովը նշեց, որ «հաջորդ երեք տարվա ընթացքում 5G ցանցի եւ ամպային ենթակառուցվածքների զարգացման համար Viva-ն նախատեսում է ներդնել շուրջ 150 միլիոն ԱՄՆ դոլար»։

Հաճախականությունների ձեռքբերում՝ 5G ցանցի ընդլայնման նպատակով

Սպրիլին կայացած մամուլի ասուլիսում Viva-ի գլխավոր տնօրեն Արմեն Ավետիսյանն ասել է.

«Viva-ն այսօր արդեն ունի ռադիոհաճախականությունների երկու անգամ ավելի մեծ ռեսուրս, քան առաջ, ինչը Viva-ի պատմության մեջ՝ ռադիոհաճախականությունների ձեռքբերման նպատակով երբեւէ իրականացրած ամենախոշոր ներդրումի արդյունք է. 2.5 միլիարդ դրամի ներդրում՝ ուղղված 5G ցանցի համար նախատեսված ռադիոհաճախականությունների օգտագործման թույլտվություն ստանալուն, ինչը տեղի ունեցավ այս տարվա ապրիլի 2-ին»:

Արմեն Ավետիսյանը տեղեկացրել էր, որ առաջիկա 7 տարվա ընթացքում ընկերությունը պլանավորում է 5G տեխնոլոգիայով փուլ առ փուլ ծածկույթ ապահովել գործող, ինչպես նաեւ նոր մայրուղիներում, սահմանային գործող եւ նոր մաքսակետերում, բոլոր քաղաքներում, Ակադեմիական քաղաքում եւ Ինժեներական քաղաքում:  

Արմեն Ավետիսյանը նաեւ նկատել էր, որ Viva-ն Հայաստանում առաջինն էր 5G ցանց ներդրել Երեւանի եւ Գյումրու կենտրոններում:

Oracle-ի հետ գործընկերություն

Նոյեմբերին Viva-ն հայտարարել է Oracle-ի հետ գործընկերության մասին՝ բիզնես հատվածի համար նոր հնարավորություններ բացելու նպատակով: 

Համագործակցությունը նպատակ ունի ապահովել ձեռնարկությունների համար ամպային լուծումների եւ բիզնես-հավելվածների հասանելիություն: 

Արբանյակային կապ

Նոյեմբերին Viva-ի գլխավոր տնօրեն Արմեն Ավետիսյանը հայտարարեց, որ ընկերությունը պատրաստվում է արբանյակային կապի տեղակայմանը: 

Արմեն Ավետիսյանի խոսքով՝ Viva-ի ցանցակառուցման ռազմավարությունը հիմնված է պահուստայնության, տեխնոլոգիական բազմազանության եւ շարունակական նորարարության սկզբունքների վրա: Ընկերությունը տեղակայել է բարձր մակարդակի բազմազան օպտիկամանրաթելային մագիստրալ, որը միացնում է եվրոպական կետերը: Հիբրիդային ճարտարապետությունը, որն ինտեգրում է ցամաքային ցանցերը, ամպային հարթակը եւ NFV-հիմքով (Network Function Virtualization) լուծումները, պատրաստվում է հաջորդ փուլին՝ արբանյակային կապի տեղակայմանը՝ առավելագույն մակարդակի հասանելիություն ապահովելու համար կրիտիկական ենթակառուցվածքի համար: