Նուբար Աֆեյան. Գիտության ոլորտում չենք կարող միայն խոսելով սահմանափակվել

Moderna ընկերության համահիմնադիր եւ նախագահ, Flagship Pioneering ընկերության հիմնադիր եւ գործադիր տնօրեն Նուբար Աֆեյանը վստահ է, որ գիտության եւ տեխնոլոգիաների զարգացումը կարեւոր է ցանկացած երկրի եւ հատկապես Հայաստանի ապագայի համար:

Սիվիլնեթի հետ հարցազրույցում նա հիշեցրել է, որ մի քանի տարի առաջ Ռուբեն Վարդանյանի եւ այլ գործընկերների հետ իրենք հիմնել են Հայաստանի գիտության եւ տեխնոլոգիաների հիմնադրամը (FAST), որը տարբեր ուղղություններով աշխատանք է ծավալում:

Նուբար Աֆեյանն ասել է, որ այդ աշխատանքի հիմնական նպատակներից է առանձնացնել գիտական եւ տեխնոլոգիական այն ոլորտները, որտեղ «Հայաստանը կարող է մրցունակ լինելու բացառիկ հնարավորություններ ունենալ՝ ի նկատի ունենալով մեր ունեցած արտաքին ռեսուրսները»:

Նրա խոսքով, եթե Հայաստանի կառավարությունը ցուցադրի, որ պատրաստ է հետեւողական աշխատել գիտության զարգացման համար՝ հատկապես մեծ ուշադրություն դարձնելով կրթական ոլորտին, դա պայմաններ կստեղծի տարբեր համագործակցային ձեւաչափերի համար՝ հայերի եւ այլ ազգերի գիտնականների հետ:

«Ցանկացած նախաձեռնություն, որը չի ներառում կառավարությունը, փոքրածավալ է մնալու: Գիտության եւ տեխնոլոգիաների ոլորտում մենք չենք կարող սահմանափակվել միայն խոսելով, մեզ անհրաժեշտ է ունենալ համակարգված ռազմավարություն, որի շրջանակում կառավարությունը կանի գործի իր մասը, իսկ համայնքի մնացած անդամները՝ իրենց մասը», - շեշտել է Նուբար Աֆեյանը: