Mercer. Միշտ հաճույքով ենք աշխատում հայաստանյան ընկերությունների հետ

Մարդկային ռեսուրսների կառավարման խորհրդատվական Mercer միջազգային ընկերությունը հայաստանյան լսարանի համար այսօր կազմակերպել էր վեբինար, որի նպատակն էր ներկայացնել ընկերության գործունեությունը եւ համագործակցության եզրեր գտնել տեղական տեխնոլոգիական համայնքի հետ:

Ընկերության ներկայացուցիչ Ելենա Կուրգանովան նշել է, որ Mercer-ն ավելի քան 18 տարի է՝ գործունեություն է ծավալում ԱՊՀ երկրներում:

Նրա խոսքով, արդեն մի քանի տարի է Mercer-ը համագործակցում է Հայաստանում գործող մի շարք գլոբալ ընկերությունների ներկայացուցիչների հետ՝ տրամադրելով բարձրորակ շուկայական տվյալներ՝ հարցումների միջոցով, ինչպես նաեւ աջակցում է մարդկային ռեսուրսների կառավարման տեղական համայնքին եւ մասնագետներին՝ տարբեր թրեյնինգների եւ զարգացման ծրագրերի միջոցով:

Ընկերության ներկայացուցիչ Պատրիկ Գուտմանն անդրադարձել է համաշխարհային տեխնոլոգիական ոլորտում COVID-19-ի հետեւանքով ձեւավորված թրենդներին: Նա խոսել է համավարակի արդյունքում տուժած եւ, հակառակը, աճ գրանցած ընկերությունների մասին:

«Իհարկե, կան բազմաթիվ տեխնոլոգիական ընկերություններ, որոնք համավարակի պատճառով վատ վիճակում են՝ կապված գործունեության ուղղության հետ: Բայց առկա են նաեւ ընկերություններ, որոնք իրենց շատ լավ են զգում: Օրինակ, Amazon-ը նախատեսում է լրացուցիչ 100 հազ. մարդու աշխատանքի ընդունել միայն ԱՄՆ-ում՝ այս տարի: Կամ, օրինակ, Zoom-ը, որը կտրուկ աճ է գրանցում: Այս ընկերություններին պետք են նոր ուժեր, որոնք կօգնեն նոր հաճախորդներին ծառայություններ մատուցել»,- ընդգծել է Պատրիկ Գուտմանը:

Mercer-ի ներկայացուցիչ Անա Կեկեզին իր հերթին հավելել է, որ ակտիվորեն աշխատում են տեխնոլոգիական ոլորտի համար լուծումներ մշակելու ուղղությամբ:

«Մենք շատ ենք սիրում Հայաստանը, այստեղ ընկերներ ունենք: Միշտ հաճույքով ենք աշխատում տեղական ընկերությունների հետ: Շնորհավորում ենք Հայաստանի տեխնոլոգիական համայնքին՝ ոլորտի զարգացման այս հիանալի տեմպերի առիթով: Կարեւոր է նշել, որ հայաստանյան ընկերությունները զարգանում են ոչ միայն տեղական, այլեւ միջազգային շուկայում: Այդ իսկ պատճառով որոշեցինք կազմակերպել այս վեբինարը՝ եւ հասկանալ, թե ինչով կարող ենք աջակցել այդ ընկերություններին»,- նշել է նա: