HIVE Ventures-ի համահիմնադիրը՝ վենչուրային կապիտալի «կուլիսների» մասին

Հայաստանի ազգային պոլիտեխնիկական համալսարանում օրերս կայացել է HIVE Ventures-ի համահիմնադիր Նինա Աչաջյանի`«Վենչուրային կապիտալ՝ կուլիսների հետեւում» սեմինարը։

Նինա Աչաջյանը խոսել է թոփ վենչուրային ընկերությունների հետ հանդիպումների, ինչպես նաեւ ստարտափների ներկայացման առանձնահատկությունների մասին։

«Հաճախ ստարտափները ձախողում են ոչ թե այն պատճառով, որ գաղափարը լավը չէ, այլ ներկայացման մոտեցումն ու ուղիներն են սխալ ընտրված: Առաջին լուրջ քայլը պետք է լինի բիզնեսի նախապատրաստումը ներդրումներին՝ կազմել բիզնես պլան, ցույց տալ ներդրումների օգտագործման ժամանակացույցը եւ սպասվելիք արդյունքները, մի խոսքով այն ամենը, ինչի համար ներդրողը պետք է գումար տրամադրի: Պետք է խոսել նաեւ ստարտափի նախագծի եւ թիմի առավելության մասին: Եթե ներդրողը համոզվի, ապա ամեն ինչ կհաջողվի»,- ընդգծել է Նինա Աչաջյանը:

Նրա խոսքով՝ վերջին շրջանում հայաստանյան ստարտափ էկոհամակարգն աննախադեպ աճ է արձանագրել եւ դա մեծապես կապված է ստարտափ նախագծերը վենչուրային ընկերություններին գրագետ ներկայացնելու հետ:

Նինա Աչաջյանն ավարտել է Հարվարդի համալսարանը` ստանալով «Բիզնես կառավարում կառավարության մեջ» բակալավրի աստիճան, արժանացել է Michael C. Rockefeller կրթաթոշակի:

Սեմինարը կազմակերպվել էր ՀՀ տրանսպորտի, կապի եւ տեղեկատվական տեխնոլոգիաների նախարարության աջակցությամբ: