Հայաստանում աքսելերացիոն նոր ծրագիրն ընդունում է հայտեր

Ձեռնարկությունների ինկուբատոր հիմնադրամը (ՁԻՀ) եւ Ինովացիոն լուծումների եւ տեխնոլոգիաների կենտրոնը (ISTC) հոլանդական Crosspring աքսելերատորի հետ մեկնարկում են համատեղ աքսելերացիոն ծրագիր:

Աքսելերացիոն ծրագրի նպատակն է աջակցել հայկական ստարտափերի առաջխաղացմանը եվրոպական շուկայում եւ նպաստել տեխնոլոգիական բիզնեսների զարգացմանը: Ծրագրին կմիանան եւ մասնակիցներին իրենց խորհուրդներով կուղղորդեն նաեւ հոլանդական Crosspring ինկուբատորի մենթորները:

Հայտերի լրացման վերջնաժամկետը մարտի 15-ն է:

Մրցույթին կարող են մասնակցել հայկական ստարտափներ, որոնք ունեն արդեն մշակված արտադրանք եւ բիզնես նախագիծ հետեւյալ ոլորտներում՝

-Արհեստական բանականություն,
- Կիբերանվտանգություն,
- Լրացված իրականություն (AR)/ վիրտուալ իրականություն (VR),
- BI (Business Intelligence) / Big Data,
- Ֆինանսական տեխնոլոգիաներ:

Դիմորդները պետք է նաեւ հետաքրքրված լինեն ԵՄ շուկայով եւ ունենան պոտենցիալ՝ այդ շուկայում աճելու համար:   

Ընտրության հիմնական չափանիշներն են՝
-    Արտադրանքի նորարարություն,
-    Հմտությունների հավասարակշռվածություն թիմի անդամների միջեւ,
-    Արտադրանքի/տեխնոլոգիայի զարգացման մակարդակ,
-    Միջազգային զարգացման պլաններ՝ հատկապես եվրոպական շուկայում,
-    Ծրագրի/արտադրանքի մեծացման պոտենցիալ:

Աքսելերացիոն ծրագրին կարող է մասնակցել առավելագույնը 12 թիմ: Վերջում կկայանա Դեմո օր, որի ընթացքում կընտրվի 1-2 թիմ՝ Նիդեռլանդներ մեկնելու եւ Crosspring-ում 1 շաբաթ անցկացնելու, հոլանդական բիզնես միջավայրին ծանոթանալու, ինչպես նաեւ պոտենցիալ հաճախորդների եւ բիզնես գործընկերների հանդիպելու համար:

Հիշեցնենք, որ Crosspring ինկուբատորը փետրվարին հայտարարեց Հայաստանում գործող՝ լրացված իրականության լուծումներ մշակող Triple-E ստարտափում ներդրում կատարելու մասին:

Crosspring-ի հիմնադիր Մորիս Բեքենդ Վերվիի հետ Itel.am-ի զրույցը կարդացեք այստեղ: