LinkedIn-ի եւ eBay-ի հիմնադիրները կպայքարեն արհեստական բանականության վտանգների դեմ

LinkedIn-ի հիմնադիր Ռեյդ Հոֆմանը եւ eBay-ի հիմնադիր Պիեր Օմիդյարի շահույթ չհետապնդող Omidyar Network-ը $10-ական մլն են նվիրաբերել՝ ֆինանսավորելու ակադեմիական այն հետազոտությունները, որոնք կխոչընդոտեն հասարակությանը վնասող արհեստական բանականության համակարգերի ստեղծումը:

Recode-ի փոխանցմամբ` եւս $5 մլն հիմնադրամը ստացել է Knight Foundation-ից, $1-ական մլն` William and Flora Hewlett Foundation-ից եւ Raptor Group-ի հիմնադիր Ջիմ Պալլոտայից: Գումարը կտնօրինվի Մասաչուսեթսի տեխնոլոգիական ինստիտուտի Մեդիա Լաբի եւ Հարվարդի համալսարանի Ինտերնետի եւ հասարակության Բերքման Քլեյն կենտրոնի կողմից:

Չնայած նրան, որ արհեստական բանականությունն ունի ակնհայտ առավելություններ, շատերը, այդ թվում` Սպիտակ տունը եւ Էլոն Մասկը, զգուշացրել են, որ այդ համակարգերը կարող են խնդիրներ առաջացնել:

Արհեստական բանականության համակարգերը վերլուծում են զանգվածային ծավալի դատա, ինչը նախ դասակարգվում է մարդկանց կողմից՝ նրանց բոլոր նախապաշարումներով եւ հակումներով հանդերձ:

Կֆինանսավորվեն այն հետազոտությունները, որոնք կպարզեն, թե ինչպես կարող են սոցիալապես պատասխանատու արհեստական բանականության համակարգերը ձեւափոխվել, որպեսզի դրանցով աշխատող համակարգչային ծրագրերը, որոնք օգտագործվում են կրթության, տրանսպորտի եւ արդարադատության ոլորտներում որոշումներ կայացնելու հարցում, մնան հաշվետու եւ արդարացի: