Լրացված իրականությունն ու հայկական տարազները՝ նոր հավելվածում

Վերջերս գործարկված Armenian National Costume հավելվածը հնարավորություն է տալիս լրացված իրականության (AR) տեխնոլոգիաների միջոցով լուսանկարվել նախընտրած տարազով եւ տեղադրել այն սոցցանցում:

Հավելվածը հասանելի է AppStore-ում եւ Google Play-ում:

Հավելվածի հեղինակը The NAME Production-ն է: Տեխնիկական մասով զբաղվել է ARLOOPA ընկերությունը:


Itel.am-ի հետ զրույցում The NAME Production-ի արտ մենեջեր Նռանե Գրիգորյանը պատմել է, որ հավելվածում ներառված է ավելի քան 40 տարազաձեւ: Համագործակցել են Հայաստանի պատմության թանգարանի հետ:

«Մեր թիմը կազմված է 6 մենեջեր աղջիկներից: Լինելով շատ տարբեր՝ մենք աշխատում ենք միասին, որովհետեւ սիրում ենք արվեստն ու ցանկանում ենք տեսնել մեր երկրի մշակութային կյանքն ավելի ակտիվ: Մեր բոլոր նախագծերի շրջանակում մենք փորձում ենք միավորել հայկական ավանդույթները, սովորույթները, մշակութային եւ ազգային մեծ ժառանգությունը՝ նորարարությունների, նորաձեւության եւ ժամանակակից միտումների հետ: Մեր հավելվածը կհետաքրքրի բոլոր տարիքի կանանց»,- նշել է նա:

Նռանե Գրիգորյանը տեղեկացրել է, որ առաջիկայում հավելվածը կներկայանա նոր գործառույթներով:

Նարինե Դանեղյան