Հայաստանի ազգային արխիվի տնօրեն Ամատունի Վիրաբյանը
photo © PAN Photo

Ազգային արխիվն այս տարի 100 հազ. փաստաթուղթ է թվայնացրել

Հայաստանի ազգային արխիվի տնօրեն Ամատունի Վիրաբյանն ասել է, որ 2015թ. արխիվը մոտ 100 հազ. փաստաթուղթ է թվայնացրել:

Ամատունի Վիրաբյանն այս մասին հայտնել է այսօր՝ լրագրողների հետ հանդիպմանը:

Նրա խոսքով՝ աշխատանքները կրկնապատկվել են, ինչը թվայնացման սարքերի ավելացման արդյունքն է:

«IDEA հիմնադրամն Ազգային արխիվին թվայնացման երկու սարք է նվիրել, ինչի շնորհիվ կրկնակի թվով փաստաթղթեր են արխիվացվում»,- ասել է նա:

Թվայնացման գործընթացում աշխատում է 35 մարդ, բացի լուսանկարներից՝ պատրաստվում են փաստաթղթերի էլեկտրոնային անձնագրերը, ստեղծվում է որոնողական համակարգ:

«Առաջնային թվայնացնում ենք այն փաստաթղթերը, որոնք մեծ պահանջարկ ունեն: Դրանք հիմնականում մարդկանց ծագմանը վերաբերող փաստաթղթերն են, եկեղեցու չափաբերական մատյանները, մարդահամարները»,- ասել է Ամատունի Վիրաբյանը:

Հայաստանի ազգային արխիվը տարեկան մոտ 200 հազ. փաստաթուղթ է թվայնացնում: Գործընթացը սկսվել է 2010-ից. այս հինգ տարիների ընթացքում արխիվի էլեկտրոնային շտեմարանը համալրվել է մոտ 1 մլն փաստաթղթով:

Հայաստանի ազգային արխիվում պահվում է 350 մլն փաստաթուղթ: