photo © VivaCell-MTS
photo © VivaCell-MTS
photo © VivaCell-MTS
photo © VivaCell-MTS
photo © VivaCell-MTS
photo © VivaCell-MTS

ՎիվաՍել-ՄՏՍ-ի եւ Հայաստանի «Ֆուլեր Տնաշինական Կենտրոնի» համագործակցությունը շարունակվում է (ֆոտոշարք)

ՎիվաՍել-ՄՏՍ-ի եւ Հայաստանի «Ֆուլեր Տնաշինական Կենտրոնի» համագործակցության շնորհիվ, սահմանամերձ Երվանդաշատ գյուղի 8 ընտանիքի համար ընթացիկ տարին դարձել է հիշարժան. լուծվել է նրանց համար գերխնդիր դարձած տան հարցը:

ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, ընկերության աշխատակիցները եւ Հայաստանի «Ֆուլեր Տնաշինական Կենտրոնի» թիմը հերթական այցելությամբ Արմավիրի մարզի Երվանդաշատ եւ Մարգարա գյուղերի եւս 5 ընտանիքի հետ կիսել են նրանց երջանկությունը: Արմավիրի մարզի Երվանդաշատ եւ Մարգարա գյուղում այս տարի 9 ընտանիք ձմեռը դիմավորելու է առանց մտահոգությունների, հաստատակամ ու անհոգ:

«Հայրենիքը սուրբ հասկացություն է, ամենավեհը գաղափարներից: Հայրենիքը մեր ինքնության հիմնաքարն է: Միեւնույն ժամանակ՝ այն նույնքան շոշափելի է, որքան մեզ շրջապատող իրերը: Հայրենիքը գյուղացու կողմից մշակվող բերրի հողն է, դրանից ստացվող բարիքը, բնության հետ ներդաշնակ ապրող գյուղացին, մայր հողին կպած ուժեղ ընտանիքները, որ սերնդեսերունդ փոխանցում են հողը մշակելու արվեստը՝ իրենց ծննդավայրի հանդեպ սիրո հետ շաղախված: Հայրենիքը օդն է, որ շնչում ենք, հովվի աչքերն են՝ պարզ, ինչպես այն աղբյուրի ջուրը, որից նա իր ծարավն է հագեցնում: Հայրենիքը հավաքական այն հավատամքն է, որ մեզնից յուրաքանչյուրը՝ այսօրվա հայը, պետք է մնա այստեղ եւ իր նախնիների սրբազան հողը փոխանցի իր երեխաներին: Մեր Հայրենիքը պահպանելու համար պետք է աշխատենք, աշխատենք ջանասիրաբար, զօր ու գիշեր, առանց ջանք խնայելու: Պետք է կառուցենք՝ գիտակցելով, որ ամեն կառուցած տան հետ մենք նորոգում ենք մեր հավատը: Ոչ ոք դա չի անելու մեր փոխարեն»,- ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

«Նվազագույնը, որ մեզնից յուրաքանչյուրը կարող է անել այս մարդկանց համար այն է, որ ստեղծենք կենցաղային տարրական պայմաններ, ամուր տանիք ու կայուն պատեր: Հայ մարդու համար տունն ավելին է, քան կացարանը, ու մենք փորձում ենք անել հնարավորը, որպեսզի եւս մի քանի հայ ընտանիք ձերբազատվի անմխիթար պայմաններում ապրելու հոգսից»,- ասել է Հայաստանի «Ֆուլեր Տնաշինական Կենտրոնի» նախագահ Աշոտ Եղիազարյանը:

«Արդեն մեկ ամիս կլինի, ինչ մեր համագյուղացիներից մի քանիսն ավարտել են իրենց տան շինարարությունը: Մենք ակնածանքով էինք նայում այդ գործընթացին ու ինչ-որ տեղ նաեւ հուսահատվում` մտածելով, թե կգա՞ արդյոք այն պահը, որ մենք էլ ավարտենք մեր տան վերանորոգումը եւ վերջապես զգանք ապահով ու բարեկեցիկ ապրելու բերկրանքը: Այսօր այդ հուսահատությունից ոչինչ չի մնացել»,-ասել է Ծովինար Գրիգորյանը:

Ծրագրի շրջանակներում Արմավիրի մարզում այս տարի վերանորոգվել է 6, ավարտին հասցվել 2 կիսակառույց տան շինարարություն եւ գնվել է մեկ տուն:

Սահմանամերձ գյուղերում բնակարանաշինության ամբողջ ծրագրի համար ՎիվաՍել-ՄՏՍ-ը կատարել է 55 մլն դրամի ներդրում, իսկ Հայաստանի «Ֆուլեր Տնաշինական Կենտրոնը» իրականացնում է ծրագիրը: