ԱրմենՏել-ի աջակցությամբ քննարկվել են բջջային հավելվածների ստեղծման խնդիրները

Հունվարի 18-19-ին «ԱրմենՏել» ընկերությունը «Տեխնոլոգիական Զարգացման Կենտրոն» հիմնադրամի հետ համատեղ անցկացրել է Հայաստանում բջջային բովանդակության ոլորտին նվիրված սեմինար` բջջային հավելվածների հայաստանյան ծրագրավորողների մասնակցությամբ:

Mobile Developer Day խորագիրը կրող սեմինարի ընթացքում խոսվել է բջջային բովանդակության զարգացման եւ ձեւավորման մասին` մասնակից բջջային բովանդակություն մշակող ծրագրավորողների եւ բիզնես ոլորտի ներկայացուցիչների հետ:

Microsoft Հայաստանյան գրասենյակի ծրագրավորման գործիքների պատասխանատու Դավիթ Քոչարյանը ներկայացրել է բջջային հավելվածներ ձեւավորելու գործում Windows Phone-ի ընձեռած  հնարավորությունները:

«ԱրմենՏել» ՓԲԸ գլխավոր տնօրեն Անդրեյ Պյատախինը խոսել է հեռահաղորդակցության ոլորտում բջջային հավելվածների դերի, Հայաստանում սպասելիքների եւ առաջիկա անելիքների մասին:

«ՏՏ ոլորտի զարգացման տեսանկյունից Հայաստանը մեծ ներուժ ունի: Այսպիսի սեմինարները կարեւոր են, քանի որ նման քննարկումների ու մտքերի փոխանակման ընթացքում են ծնվում լավագույն գաղափարները»,-ասել է Անդրեյ Պյատախինը:

Նա համոզմունք է հայտնել, որ իրենց օգնությամբ ՏՏ ոլորտի ներկայացուցիչներին կհաջողվի ստեղծել այնպիսի առաջարկներ, որոնք կօգտագործվեն ոչ միայն Հայաստանում, այլեւ արտերկրում ու սփյուռքում, եւ կարող են միջազգային ճանաչման հասնել:

«ԱրմենՏել» ընկերության Ինֆորմացիոն տեխնոլոգիաների գծով տնօրեն Մաքսիմ Խալմատովը ներկայացրել է բջջային բովանդակության զարգացման ոլորտում Beeline-ի հետ համագործակցության հնարավորությունները:

«Տեխնոլոգիական զարգացման կենտրոն» հիմնադրամի տնօրեն Սամվել Չախալյանը խոսել է Հայաստանում բջջային բովանդակության զարգացման հնարավոր ուղղությունների մասին:

Սեմինարի ընթացքում քննարկվել  է նաեւ բջջային հավելվածների տեղայնացման թեման: Քննարկումների արդյունքում մասնակիցները մշակել են աշխատանքային պլան, որի նպատակն է խթանել տեղական բջջային բովանդակության հանդեպ աճող  պահանջների բավարարումը:

Հավաքին մասնակցել են «ԱրմենՏել», Microsoft, mLab, Zoom Graphics, Helix Consulting, Fluger, Dinamica, Siply Technologies, OMG Studio ընկերությունների ներկայացուցիչները: