Երեւանի քաղաքապետը եւ «ԱրմենՏել»-ի ղեկավարը քննարկել են հնարավոր համատեղ ծրագրերը

Երեւանի քաղաքապետ Տարոն Մարգարյանն այսօր հանդիպել է «ԱրմենՏել» ընկերության գլխավոր տնօրեն Անդրեյ Պյատախինի հետ:

Տարոն Մարգարյանն ասել է, որ քաղաքապետարանը կյանքի կոչված ՏՏ-ոլորտի զարգացմանն ուղղված մի շարք հաջողված նախագծեր ունի, որոնք իրականացվել են մասնավոր հատվածի հետ համագործակցության արդյունքում:

«Այսօր լուրջ բարեփոխումներ ենք իրականացնում քաղաքային տնտեսության կառավարման կատարելագործման ուղղությամբ, որոնք նպատակ ունեն ապահովել բոլոր ոլորտների համաչափ զարգացումն ու բարելավել ներդրումային միջավայրը: Եվ այս համատեքստում մենք պատրաստ ենք համագործակցել նաեւ «ԱրմենՏել» ընկերության հետ ինչպես քաղաքային կառավարման, այնպես էլ տեղեկատվական տեխնոլոգիաների ոլորտներում»,- ընդգծել է Տարոն Մարգարյանը:

Անդրեյ Պյատախինն իր հերթին նկատել է, որ «ԱրմենՏել» ընկերությունը պատրաստակամ է ներգրավվել քաղաքապետարանի հետ համատեղ ծրագրերի իրականացման գործում:

«Մենք եւս ուրախ կլինենք ի դեմս Երեւանի քաղաքապետարանի ունենալ վստահելի գործընկեր ու մեր լուման ներդնել Երեւանի զարգացման գործում: Հուսով եմ, որ առաջիկայում մեր համագործակցությունն առավել գործնական դաշտ կթեւակոխի»,- նշել է  Անդրեյ Պյատախինը: