Երեւան/Մեդիամաքս/. Վաղը Երեւանում մեկնարկում է 8-րդ ամենամյա ԴիջիԹեք տեխնոլոգիական ցուցահանդեսը, որը տարածաշրջանում խոշորագույն ՏՏ-միջոցառումն է:
Ինչպես այսօր տեղեկացրել է ցուցահանդեսի կազմակերպիչ Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը, ցուցահանդեսին կմասնակցի շուրջ 130 տեղական եւ միջազգային ընկերություն:
«Ցուցահանդեսի արտասահմանյան մասնակիցներից են ընկերություններ Հվ. Կորեայից, Սինգապուրից, Ռուսաստանից, Վրաստանից, Գերմանիայից, Իտալիայից եւ ԱՄՆ-ից: Առաջին անգամ ցուցահանդեսին կմասնակցի իտալական ImagingLab ընկերությունը, որը մասնագիտացած է ռոբոտատեխնիկայի եւ պատկերների մշակման մեջ: Կորեայի տեխնոլոգիական ձեռքբերումները ցուցահանդեսին կներկայացնի այդ երկրի Ազգային ՏՀՏ զարգացման գործակալությունը եւ Առեւտրաարդյունաբերական պալատը: Սինգապուրից միջոցառմանը կմասնակցի BANSEA վենչուրային հիմնադրամը»,- ասել է Կարեն Վարդանյանը, հավելելով, որ ցուցահանդեսին ակնկալվում է ավելի քան 20 000 այցելու:
Միջոցառման գործընկեր Մայքրոսոֆթ-Հայաստանի ղեկավար Գրիգոր Բարսեղյանը նշել է, որ հիմա Մայքրոսոֆթի համար շատ կարեւոր ժամանակաշրջան է, երբ ընկերությունը ներկայանում է նորովի եւ նոր պրոդուկտներով, եւ «ԴիջիԹեքը յուրահատուկ հնարավորություն է ցուցադրելու Մայքրոսոֆթի նորագույն ծրագրային փաթեթները եւ լուծումները», որոնց թվում, մասնավորապես, կլինի Windows 8 օպերացիոն համակարգը:
Միջոցառման շրջանակներում կանցկացվեն հետեւյալ միջոցառումները.
1. The World of Engineering. Ճարտարագիտական նորարարական լուծումների ցուցադրություն շուրջ 30 տեղական եւ միջազգային ընկերությունների կողմից;
2. ԴիջիԼայֆ Սեմինարներ՝ նվիրված տեխնոլոգիաների կիրառմանը առօրյա բիզնեսում;
3. DigiTec Startup հատված, որտեղ իրենց արտադրանքը կներկայացնեն ցուցահանդեսին հատուկ պայմաններով մասնակցող 12 նորաստեղծ ընկերություններ;
4. Տեխնոլոգիական աշխատանքի տոնավաճառ, որտեղ ոլորտում աշխատել ցանկացողները հնարավորություն կունանեն հանդիպել գործատուներին, ծանոթանալ նրանց կողմից առաջարկվող թափուր աշծատատեղերին;
5. ArmRobotics ռոբոտների բաց առաջնության մասնակից ռոբոտների ցուցադրություն;
6. Open Game Contest համակարգչային խաղերի մրցույթում հայտարարագրված խաղերի ցուցադրություն:
Ցուցահանդեսը կանցկացվի հոկտեմբերի 5-ից 7-ը Երեւանի մաթեմատիկական մեքենաների գիտահետազոտական ինստիտուտի (Մերգելյան) նորաբաց «Երեւան Էքսպո» ցուցահանդեսային համալիրում:
