ՎիվաՍել-ՄՏՍ-ը ռոումինգի բարելավման համար քլիրինգ-կենտրոն է գործարկել

Երեւան/Մեդիամաքս/. ՎիվաՍել-ՄՏՍ-ը «Peter-Service» ռուսաստանյան ընկերության հետ համատեղ գործարկել է «քլիրինգ-կենտրոն», որը կոչված է էապես բարձրացնել ընկերության ռոմինգային ծառայությունների որակը:

Աճող բաժանորդային բազան, ինչպես նաեւ ընկերության ձգտումը բարելավել ռոմինգում գտնվող բաժանորդներին մատուցվող ծառայությունների որակն առաջացրել են ռոմինգային հաշվարկների սեփական կենտրոնի ստեղծման անհրաժեշտությունը: Ծրագրային կոմպլեքսի ներդնումը մեկնարկել է 2012թ. ապրիլին, եւ ներկայումս ՎիվաՍել-ՄՏՍ-ն արդեն սկսել է քլիրինգային լուծման շահագործումը, հայտնել են ընկերությունում:    

«Քլիրինգ-կենտրոնը» ապահովում է ռոմինգային բրոկերի գործողությունների կատարման հետ կապված ողջ տեղեկատվությունը, ինչպես նաեւ ռոմինգային տվյալների ուղղորդումն ու մշակումը: Բացի այդ, ռոմինգային վճարումների հետ կապված աշխատանքների մեծ մասի ավտոմատացումը կնվազեցնի օպերատորի ծախսերը: