Գործարկվել է Արցախի նորմատիվ իրավական ակտերի էլեկտրոնային տեղեկատվական համակարգը

Երեւան/Մեդիամաքս/. Հայաստանյան «Ինստիգեյթ» ՏՏ-ընկերության արցախյան մասնաճյուղը գործարկել է ԼՂՀ նորմատիվ իրավական ակտերի էլեկտրոնային www.arlaw.am տեղեկատվական համակարգը:
 
Համակարգն իրենից ներկայացնում է ինտերնետային կայքէջ, որը պարունակում է 1992-2007թթ. հրապարակված բոլոր օրենքները, դրանց փոփոխություններն ու լրացումները, ինչպես նաև 2007-ից սկսած հրապարակված բոլոր նորմատիվ իրավական ակտերը, հայտնել են Ինֆորմացիոն տեխնոլոգիաների ընկերությունների միությունում (ԻՏՁՄ):

ԼՂՀ արդարադատության նախարարության հետ համագործակցության շնորհիվ  համակարգում նոր նորմատիվ իրավական ակտերն ավելացվում են պաշտոնական հրապարակումից անմիջապես հետո։ Հաջորդ առավելությունը  նորմատիվ իրավական ակտերի հսկումն է։ Սա հնարավորություն է տալիս հսկողության տակ առնել այն ակտերը, որոնք հաճախակի են օգտագործվում։ Համակարգը օգտագործողին ավտոմատ կերպով տեղեկացնում է հսկվող ակտում իրավաբանական փոփոխության մասին: Համակարգը նաեւ թույլ է տալիս օգտվել մի քանի տասնյակ տիպային պայմանագրերի ժողովածուից: