Աշոտ Բլեյանը ցանկանում է “Հանրակրթության Դիջիտեք”-ը դարձնել ավելի զանգվածային ու հեղինակավոր

Երեւան/Մեդիամաքս/. Հունվարի 15-ից մինչեւ փետրվարի 1-ը Մխիթար Սեբաստացի կրթահամալիրի նախաձեռնությամբ անցկացվում է “Հանրակրթության Դիջիտեք 2012”-ը:

Կրթահամալիրի տնօրեն Աշոտ Բլեյանը հունվարի 24-ին կայացած “”Նորարարական կրթություն. նոր տեխնոլոգիաներ եւ մեդիա” կլոր-սեղան քննարկման ժամանակ ասել է, որ նախարարության պատվերով իրականացվող միջոցառումը թվային ուսուցման միջոցները որպես հանրակրթության արդյունավետ գործիք օգտագործելու ստուգատես է:

«Մեզ հետաքրքիր է, թե երեխաների համար այդքան  հրապուրիչ գործիքներն ինչպես կարելի է օգտագործել կրթական գործընթացում: Մեր գործընկերներ Ինֆորմացիոն տեխնոլոգիաների ձեռնարկությունների միությունը (ԻՏՁՄ), Մայքրոսոֆթը, Յունիքոմփը եւս շահագրգիռ են, որ այս միջոցառումը կայանա եւ դառնա ավելի զանգվածային ու հեղինակավոր», - ասել է նա:

Կրթահամալիրի տնօրենն ասել է, որ Հանրակրթության Դիջիտեքի 14 անվանակարգերում ընդգրկվելու համար թվային տեխնոլոգիաների միջոցով արված աշխատանքներ կարող են ներկայացնել բոլոր տարիքի սովորողները նաեւ այլ երկրներից:

«Դիջիտեքի առավելությունն իր հրապարակային լինելն է. երեխաների աշխատանքները կքննի բաց հանձնաժողովը»,-ասել է նա:

Քննարկմանը ներկա էր նաեւ ԱԺ Ժառանգություն խմբակցության պատգամավոր Անահիտ Բախշյանը, ով Մեդիամաքս-ի հետ զրույցում ասել է, որ կրթահամալիրի նախաձեռնած փորձարարական ծրագիրն իրեն հետաքրքրել է որպես հեռահար կրթության կազմակերպման ձեւ:

«Հեռահար ուսուցումը, որի սկիզբը դրել է Մխիթար Սեբաստացի կրթահամալիրը, կօգնի հաշմանդամ երեխաներին, քրեակատարողական հիմնարկների անչափահաս դատապարտյալներին կրթություն ստանալ: Բացի այդ, մասնակից երեխաների հետաքրքիր նախաձեռնություններից կարելի է ենթադրել, որ նման նորարական մեթոդները հենց այն են, ինչ ակնկալում ենք 21-րդ դարի դպրոցից»,-ասել է նա:

ԻՏՁՄ ներկայացուցիչ Վահան Հովսեփյանն էլ ասել է, որ Հանրակրթության Դիջիտեքում ԻՏՁՄ-ի դերը գործընթացի համակարգման մեջ է:

“ԻՏՁՄ-ի որոշ ընկերություններ առարկայական մասնակցություն ունեն. ԻՏՁՄ-ում ընդգրկված կազմակերպությունների ներկայացուցիչները տարբեր անվանակարգերի հաղթողների համար սահմանել են մրցանակներ, բացի այդ` փետրվարի 7-ից Դիջիտեքի մասնակիցների եւ բոլոր ցանկացողների համար կիրականացնեն վարպետության դասեր` ներկայացնելով նորագույն կրթական ծրագրերը եւ լուծումները”,-ասել է նա:

Հանրակրթության Դիջիտեքին մասնակցելու եւ ներկայացված աշխատանքներին ծանոթանալու համար ցանկացողները կարող են այցելել www.digitec.mskh.am հասցեով: