photo © http://revoseek.com

Yahoo!-ն, Microsoft-ը եւ AOL-ը դաշինք են ստեղծել Google-ի եւ Facebook-ի դեմ

Երեւան/Մեդիամաքս/. Yahoo!-ն, AOL-ը եւ Microsoft-ը կնքել են ԱՄՆ-ում ինտերնետ-գովազդի վաճառքի շուրջ համագործակցության պայմանագիր: Ընկերությունները պարտավորվում են աջակցել միմյանց գովազդային մակերեսների ավելցուկները հաճախորդներին վաճառելու գործում, ինչը նրանցից յուրաքանչյուրին հնարավորություն կտա գովազդային պաստառները ցուցադրել լսարանի ավելի լայն շրջանակին:

Համաձայնագրին մասնակցողների գլխավոր նպատակն է պաշպանել պրեմիում դասի գովազդի վաճառքի հետ կապված բիզնեսը, այսօր գրում է “Վեդոմոստի”-ն: Սոցիալական ցանցերի եւ հատկապես Facebook-ի ժողովրդականության աճի հետեւանքով այս հատվածը վտանգի տակ է:

«Հուսով ենք, որ մեր ընկերություններից յուրաքանչյուրի CPM (cost per mille, վահանակի հազար ցուցադրման գինը) ցուցանիշը կպահպանվի պատշաճ մակարդակի վրա»,- ասել է Yahoo!-ի ամերիկյան ներկայացուցչության ղեկավար Ռոս Լեւինսոնը:

“Համաձայնագիրը բացառիկ չէ եւ ոչ ոքի չի արգելում զուգահեռաբար համագործակցել գովազդի այլ վաճառողների հետ: Բայց մեզանից ոչ մեկը մտադիր չէ վերին գնային հատվածի առցանց գովազդի վաճառքի շուրջ համագործակցել Google-ի կամ Facebook-ի հետ”,- ասել է նա: