Գեորգի Չալտիկյան
photo © www.mediamax.am

Երեւանում մեկնարկել է տելեբժշկությանը նվիրված համաժողով

Երեւան: Մեդիամաքս: Տելեբժշկության հայկական ասոցիացիայի նախագահ Գեորգի Չալտիկյանն այսօր ասել է, որ տելեբժշկությունն ու էլեկտրոնային առողջապահությունը Հայաստանում գտնվում են զարգացման փուլում:

Ինչպես հաղորդում է Մեդիամաքս-ը, այսօր Սլավոնական համալսարանում մեկնարկել է տելեբժշկությանն ու էլեկտրոնային առողջապահությանը նվիրված “ԱՐՄԹԵԼԵՄԵԴ. Ճանապարհ դեպի ապագա” առաջին միջազգային համաժողովը:

“Տեղեկատվական տեխնոլոգիաները թափանցում են ցանկացած ասպարեզ, եւ առողջապահությունն այսօր հնարավոր չէ պատկերացնել առանց այդ տեխնոլոգիաների”,- ասել է Գեորգի Չալտիկյանը:

Նրա խոսքերով, Տեղեկատվական տեխնոլոգիաների ձեռնարկությունների միության (UITE) հետ համատեղ կազմակերպված համաժողովին մասնակցում են տարբեր երկրներից Հայաստան ժամանած 20 առաջատար մասնագետներ:

Ասոցիացիայի նախագահը նշել է, որ տելեբժշկության եւ էլեկտրոնային առողջության մեջ կիրառվող տեխնոլոգիաները հնարավորություն են տալիս հիվանդներին բժշկական կոնսուլտացիա ստանալ հեռավորության վրա:

“Լայնածավալ գործունեություն սկսելու համար անհրաժեշտ է պետական մարմինների աջակցությունը, կառավարությունը գիտակցում է այս ծրագրերի նշանակությունը, այս փուլում կատարվում են լուրջ քայլել Հայաստանում համատարած տելեբժշկության ցանց ստեղծելու համար”,- ասել է Գեորգի Չալտիկյանը: